Leto seldur

Liverpool hafa samþykkt að selja argentínska kantmanninn Sebastian Leto til gríska liðsins Panathinaikos.

Eins og áður hefur komið fram í fréttum hér hafði félagið samþykkt tilboð frá Panathinaikos og taldi Leto það meira en 90% líklegt að hann myndi ganga til liðs við þá.  Hann var á láni hjá aðalkeppinautunum, Olympiakos, á síðastliðnu tímabili en þeir virtust ekki hafa áhuga á því að kaupa hann, t.d. lenti hann uppá kant við þjálfara liðsins á tímabilinu sem hefur minnkað áhuga félagsins á honum.

Leto var keyptur í ágúst árið 2007 og höfðu lið eins og Real Betis og River Plate sýnt honum áhuga.  Hann spilaði sinn fyrsta leik í undankeppni Meistaradeildarinnar gegn Toulouse þann 28. ágúst og var það einn af fjórum leikjum sem hann spilaði með aðalliðinu.  Vegna atvinnuleyfisvandamála fékk hann ekki fleiri tækifæri og var lánaður út í kjölfarið.

Talið er að kaupverðið sé í kringum þrjár milljónir punda.