Xabi vill fara til Real

Samkvæmt staðarblaðinu Liverpool Echo hefur Xabi Alonso tjáð Rafa Benítez að hann vilji ganga til liðs við Real Madrid. Blaðið hefur einnig heimildir fyrir því að Rafa muni ekki verða við þessari ósk landa síns, nema Madridingar reiði fram a.m.k. 35 milljónir punda.



Alonso hefur ekki lagt fram skriflega beiðni um að verða settur á sölulista, en á að hafa gert Benítez það ljóst að hann vilji fara frá félaginu hið fyrsta.

Þessi 27 ára miðvallarleikmaður á að mæta til æfinga hjá Liverpool á sunnudag, en hann fékk heldur lengra sumarfrí vegna þátttöku sinnar í Álfukeppninni á dögunum. Alonso og umboðsmaður hans, Inaki Ibanez, vonast til að samningar við Real Madrid náist fyrir þann tima.

Spænska félagið er þó ekki talið reiðubúið til að eyða meira en 27 milljónum punda í Alonso og þar sem Benítez er ákveðinn í að láta hann ekki af hendi fyrir lægri upphæð en 35 milljónir verður fróðlegt að fylgjast með hvernig þessi farsi þróast að lokum.

Alonso gæti auðvitað lagt fram skriflega beiðni um flutning, og sett þannig aukna pressu á Benítez og Liverpool, en hann segist vera þeirrar skoðunar að hann eigi ekki að þurfa að grípa til slíkra örþrifaráða - eftir að hafa þjónað félaginu dyggilega í heil 5 ár.

Áhugi Real Madrid opinberaðist enn frekar eftir að hinn nýráðni framkvæmdastjóri félagsins, Manuel Pellegrini, lýsti skýlausum áhuga sínum á að krækja í kappann og lét hafa eftir sér að Alonso hefði margoft sýnt það og sannað hversu mikilivægur leikmaður hann væri hverju því liði sem hann léki með.

,,Alonso hefur t.d. staðið sig gríðarlega vel fyrir spænska landsliðið og það er ekkert launungarmál að Real Madrid vill kaupa hann, en við vitum að það verður ekki auðvelt, segir Pellegrini."

Rafael Benítéz gerir sér fulla grien fyrir því að yfirlýsing Alonso um að vilja ganga til liðs við Madrid mun gera það mjög erfitt fyrir Liverpool að halda í hann, jafnvel þó enn séu 3 ár eftir af samningi Alonso við félagið, en Rafa segist samt sem áður ákveðinn í því að láta hann ekki fara fyrir of lítinn pening.

Benítez veit sem er að það eru ekki margir miðjumenn í sama gæðaflokki og Xabi Alonso á lausu og ef Spánverjinn snjalli hverfur á braut þá þarf að hugsa ýmislegt í leikskipulagi liðsins upp á nýtt - og það getur tekið dýrmætan tíma.