Við munum vinna deildina á næstu tveimur árum

Fernando Torres segist vera klár í slaginn fyrir komandi tímabil og vonast til að spila alla leiki - og ekki síst vinna titla.



Torres verður væntanlega í stærra hlutverki í leiknum gegn Espanyol í dag, en í undanförnum æfingaleikjum, en hann og þeir félagar hans sem tóku þátt í Álfukeppninni fengu sem kunnugt er heldur lengra frí en aðrir leikmenn liðsins og hafa af þeim sökum ekki tekið mikinn þátt í æfingaleikjunum það sem af er.

En nú fer alvaran að byrja og Torres segist tilbúinn í slaginn og hungraður í að spila og vinna titla.

,,Ég vil bara gleyma öllum meiðslavandræðum og byrja að spila. Helst vildi ég spila hvern einasta leik, hvort heldur sem er í Úrvalsdeildinni, Meistaradeildinni eða bikarkeppnunum!"

,,Mér finnst hópurinn hjá Liverpool nógu sterkur til að vinna þá titla sem í boði eru og nú vil ég bara komast á ferðina, skora fullt af mörkum og hjálpa liðinu að landa sem flestum titlum."

,,Ég held að við þurfum ekki að kaupa fleiri leikmenn, við höfum þegar keypt Glen Johnson, sem er frábær viðbót við hópinn, og ég held að við þurfum ekki fleiri."

,,Ég hef tröllatrú á því að okkur takist að vinna ensku deildina á næstu tveimur árum."

Aðspurður um samband sitt við fyrirliðann Steven Gerrard og hvort hann hlakki til að spila með honum á ný, nú þegar réttarhöldin yfir Gerrard eru afstaðin, svarar Torres: ,,Gerrard er besti leikmaður í heimi og hann er orðinn mikill vinur minn. Það er frábært að spila með honum, það er eins og við skynjum hvorn annan inni á vellinum, rétt eins og við lesum hugsanir hvors annars."

Torres skrifaði nýverið undir samning við Liverpool til ársins 2013 og segist ánægður með lífið og tilveruna hjá félaginu.

,,Mér líður mjög vel hjá Liverpool og ég vil vera hér áfram um ókomin ár. Mitt lið á Spáni er Atletico Madrid og á Englandi er það Liverpool. Ég held að ég muni aldrei spila fyrir annað enskt félag, sérstaklega ekki Manchester United", segir Torres gallharður að lokum.