Xabi Alonso þakkar fyrir sig!

Xabi Alonso hefur nú yfirgefið Liverpool eins og allir vita. Hann fer sáttur og þakkar hér stuðningsmönnum Liverpool fyrir sig. Hann segir þá hafa verið sér góða á allan hátt.

"Ég er mjög þakklátur stuðningsmönnum Liverpool. Þeir voru alltaf hlýlegir í minn garð í þau fimm ár sem ég var hér og það verður mjög erfitt að finna jafn þakkláta stuðningsmenn."

"Ég naut virkilega þessara fimm ára en fyrir nokkrum mánuðum ákvað ég að nú væri kominn rétti tíminn til að takast á við nýja áskorun og finna sér nýtt félag. Það var þá sem Real Madrid kom til sögunnar. Nú er búið að gera samning og ég er mjög ánægður."
 
"Þessi vistaskipti voru áskorun sem mér fannst nauðsynlegt að takast á við þegar hér var komið við sögu á knattspyrnuferli mínum. Mér fannst rétt að breyta til að öðlast nýja reynslu. Þegar Real Madrid sóttist eftir mér ákvað ég að fara til baka til Spánar."

Þá hefur Xabi Alonso lagt spilin á borðið og það verður ekki annað sagt en að hann geri það á heiðarlegan og hreinskilinn hátt. Það er að minnsta kosti ekki neinn skætingur á ferðinni hér hjá honum frekar en fyrri daginn enda ekkert nema gæðin.
 
Xabi Alonso kom til Liverpool sumarið 2004. Hann lék 210 leiki og skoraði 19 mörk. Hann varð Evrópumeistari og Stórbikarmeistari 2005. Allir muna þegar hann fylgdi vítaspyrnu sinni hetjulega eftir í Istanbúl og jafnaði 3:3 gegn AC Milan. Xabi vann svo F.A. bikarinn og Skjöldinn árið 2006.

Enn jókst svo á verðlaunasafn hans, á dvalartíma hans í Liverpool, þegar Spánn vann Evrópukeppni landsliða árið 2008. Það verður því ekki annað sagt en að Xabi hafi átt farsælan feril hjá Liverpool. 

Xabi Alonso er hér með óskað alls góðs í framtíðinni.