Fernando hlakkar til að mæta Atletico

Fernando Torres hlakkar til að mæta sínum gömlu félögum í Atletico Madrid á Anfield á morgun.

Síðasti æfingaleikur Liverpool á undirbúningstímabilinu fer fram á Anfield á morgun, þegar spænska stórliðið Atletico Madrid mætir til leiks.

Eins og menn muna sjálfsagt þá var Torres meiddur í báðum leikjum Liverpool og Atletico í Meistaradeildinni s.l. vetur og það voru honum að sjálfsögðu mikil vonbrigði, en nú er hann í fullu fjöri og hlakkar til að mæta sínum gömlu liðsfélögum.

Torres skrifar á heimasíðu sína að vissulega sé þetta bara vináttuleikur, en hann vonist til að mæta Atletico einhverntíma aftur í Meistaradeildinni.

,,Það væri virkilega gaman að fá einhverntíma tækifæri til að spila með Liverpool móti Atletico á Vincente Calderon", segir Torres orðrétt.

,,Það er mikil spenna fyrir leiknum á morgun og ég hlakka mjög mikið til að taka þátt í honum. Þetta eru vinafélög og ég er viss um að leikurinn verður góð skemmtun fyrir alla, bæði þá sem taka þátt og þá sem fylgjast með."

,,Það verður samt örugglega ekkert gefið eftir, því þetta er jú síðasti leikur okkar áður en við mætum Tottenham í deildinni og þetta er síðasti leikur Atletico áður en þeir fara í undankeppnina fyrir Meistaradeildina. Þannig að menn þurfa að sýna hvað í þeim býr."

Samkvæmt heimasíðu Atletico Madrid er búið að velja 18 leikmenn fyrir leikinn gegn Liverpool og í þeim hópi er að finna fyrrum leikmann Liverpool, Frakkann Florent Sinama-Pongolle. Luis García virðist hinsvegar ekki vera í hópnum.