Við þurfum fleiri heimsklassa leikmenn

Pepe Reina segir að það sé ekki raunhæft markmið hjá Liverpool að vinna deildina á þessari leiktíð.

Í viðtali við The Guardian í dag lýsir hann þeirri skoðun sinni að helstu keppinautar Liverpool hafi mun fleiri sterka leikmenn í sínum röðum og þurfi því ekki að setja allt sitt traust á 2 leikmenn, eins og Liverpool þurfi að gera. Þar er Reina að sjálfsögðu að vísa til Steven Gerrard og Fernando Torres.

,,Lið eins og Manchester United hafa meiri breidd en við. Þeir hafa fleiri einstaklinga sem geta unnið leiki upp á eigin spýtur. Chelsea hefur líka marga sterka einstaklinga sem geta gert gæfumuninn þegar leikir eru í járnum. Þeir hafa t.d. Didier Drogba sem í krafti stærðar sinnar og styrks getur tekið á móti hvaða bolta sem er og skapað hættu. Við eigum ekki slíkan leikmann frammi með Torres."

Reina liggur ekki á þeirri skoðun sinni að Liverpool liðið treysti um of á þá Gerrard og Torres.

,,Við verðum bara að vona að þeir meiðist ekki, því þeir eru algjörir lykilmenn í liðinu. Það er vont að eiga ekki fleiri leikmenn í sama klassa."

Reina segist vonast til þess að eigendur félagsins taki sér tak og útvegi meira fé til leikmannakaupa.

,,Ég er ekkert að fara á taugum, en það væri gott að fá fleiri toppklassa leikmenn til liðsins, það segir sig sjálft. Við erum með gott byrjunarlið, en hópurinn mætti að mínu viti vera ennþá sterkari."

,,Það virðast ekki vera til peningar til frekari leikmannakaupa eins og stendur og sem leikmaður getur maður ekkert gert í því, maður verður bara að bretta upp ermarnar og halda áfram að berjast."

Jafnvel þótt Reina virðist fremur svartsýnn í þessu viðtali afskrifar hann ekki möguleika Liverpool á titlinum.

,,Við getum auðvitað alveg unnið titilinn, en sumir keppinautar okkar eru óneitanlega í betri stöðu en við. Chelsea, Manchester United, Arsenal og Manchester City, til að nefna nokkur."

,,Við viljum að sjálfsögðu vinna deildina og vonandi getum við það, en ég verð að segja að á þessum tímapunkti er það ekki fyllilega raunhæft markmið",segir Pepe Reina að lokum.