Áfram til sigurs!

Það er grannaslagur í Liverpool á morgun og væntanlega hefur það ekki farið framhjá neinum í þeirri borg. Flest hefur gengið á afturfótunum hjá báðum liðunum síðustu vikurnar og þess vegna væri það vel þegið, í herbúðum beggja, að herja fram sigur. Steven Gerrard, fyrirliði Liverpool, veit hvað er í húfi og brýnir sína menn til að vinna sigur í leiknum mikilvæga!

"Við vitum alveg að gengi okkar á þessari leiktíð hefur ekki verið eins og við vildum og við erum mjög vonsviknir yfir því að við erum úr leik í Meistaradeildinni. Við erum langt frá því ánægðir með hvernig við höfum verið að spila í Úrvalsdeildinni en eina leiðin til að snúa gengi liðsins við er að standa saman. Við höfum áður sýnt hverju við getum áorkað þegar við gerum það og segja má að það eina jákvæða í þessum erfiðleikum er að við erum allir sem einn maður að reyna að bæta úr stöðunni."
 
"Framkvæmdastjórinn, starfsliðið og leikmennirnir eru allir að vinna, eins og hver og einn mögulega getur, að því að reyna að bæta það sem ekki hefur gengið nógu vel. Það verður ekki auðvelt og við við erum búnir að koma okkur í erfiða stöðu. En við höfum trú og sjálfstraust til að ná einu af fjórum efstu sætunum."

"Það á eftir að skipta miklu að fá einhverja af þeim leikmönnum, sem hafa verið meiddir, til leiks aftur og halda þeim heilum. Það á eftir að hressa alla við að fá þessa menn aftur til leiks en núna er lykilatriði að standa saman og vinna sig út úr vandanum. Við skuldum félaginu, okkur sjálfum og síðast en ekki síst stuðningsmönnum okkar, sem hafa stutt frábærlega við bakið á okkur þegar illa hefur gengið, að koma okkur út úr þessum ógöngum."

Aðventan hefst á morgun. Aðventa táknar bið. Stuðningsmenn Liverpool eru búnir að bíða síðustu vikur eftir að liðið þeirra hrökkvi í gang. Vonandi tekur sú bið enda á Goodison Park á morgun!