Ætlum að berjast í Evrópudeildinni!

Rafael Benítez vildi frekar vera að undirbúa lið sitt fyrir lék í Meistaradeildinni þessa vikuna. Þess í stað er hann að búa lið sitt undir leik við rúmenska liðið Unirea Urziceni í Evrópudeildinni. Rafa er samt ákveðinn í að láta liðið sitt finna fyrir sér í deild þeirri sem kennd er við Evrópu.

"Auðvitað vildi ég frekar vera að berjast um titilinn eða í Meistaradeildinni en það þýðir ekki að fást um það. Maður verður að líta jákvætt á hlutina og snúa málum sér í hag. Núna gefst annað tækifæri og við stefnum að því að spila betur. Okkar markmið er að komast áfram í Evrópudeildinni og ná sem bestu sæti í Úrvalsdeildinni."

Liverpool er eitt þeirra liða sem færðust yfir í Evrópudeildina eftir að hafa fallið úr Meistaradeildinni núna fyrir jólin. Margir sparkspekingar telja að Liverpool sé eitt sigurstranglegasta liðið í Evrópudeildinni enda er það þraunreynt í Evrópuleikjum. Rafael Benítez segir að mörg sterk lið séu í keppninni.

“Það eru sterk lið eftir í keppninni. Stuðningsmenn okkar vilja að við vinnum titla og ég er viss um að stemmingin á eftir að aukast ef við komumst í gegnum nokkrar umferðir í keppninni. Evrópudeildin er eini möguleiki okkar til að vinna titil á þessu keppnistímabili og við munum gera okkar besta til að vinna keppnina."

Evrópudeildin hét, fyrir þetta keppnistímabil, Evrópukeppni félagsliða og Rafael Benítez á mjög góðar minningar úr þeirri keppni. Síðasti leikur hans sem framkvæmdastjóri Valencia var úrslitaleikur keppninnar árið 2004. Valencia vann þá 2:0 sigur gegn Marseille í Gautaborg. Hann gæti því náð öðrum sigri sínum í þessari keppni í Hamborg í vor og væri það vel þegið!