Lee varar City við

Sammy Lee segir að Manchester City muni mæta allt öðru Liverpool liði en mætti til leiks þegar liðin mættust síðast í nóvember.  Þeim leik lauk með 2-2 jafntefli sem þýddi að Liverpool hafði ekki unnið sigur í fimm leikjum í röð.

Liverpool mæta á heimavöll City manna í dag með aðeins eitt tap í síðustu 8 leikjum í deildinni og telur Lee að aukið sjálfstraust liðsins þýði að City mæti betra Liverpool liði nú.

,,Leikurinn var skrýtinn fyrir marga hluta sakir og hann var blásinn upp af mörgu leyti," sagði Lee þegar hann minnist fyrri leiks liðanna á tímabilinu.  ,,En í dag er annar stórleikur hjá okkur og við verðum að halda áfram.  Sjálfstraust skiptir öllu í íþróttum, sérstaklega í knattspyrnu.  Án þess að hafa verið að spila frábærlega höfum við hljóðlega náð árangri og komist á gott skrið."

,,Fyrir utan Arsenal leikinn höfum við staðið okkur vel í undanförnum leikjum, dagurinn í dag verður öðruvísi og við vitum það.  Við erum að fara til Manchester, þeir verða klárir í slaginn, vonandi verðum við það líka og við verðum að reyna að fá eins mikið útúr leiknum og við getum."

City eru sem stendur einu sæti og einu stigi ofar en Liverpool í deildinni og eiga þeir þar að auki leik til góða.  Lee veit að það verður mikið í húfi í leiknum en telur að það séu nógu margir leikir eftir í deildinni sem séu jafn mikilvægir og þessi í keppninni um fjórða sætið.

Hann sagði:  ,,Þetta verður stórleikur en samt bara í þeirri þýðingu að liðið sem vinnur leikinn mun komast aðeins fjær keppinauti sínum.  Að því sögðu er nóg eftir af tímablinu ennþá.  Ég hef sagt það áður og vonandi hljómar þetta ekki klisjulega en allir okkar leikir eru stórleikir.  Þeir hafa hvert sitt mikilvægi, og við þurfum því að vera vissir um að við séum með allt á hreinu, fullkomlega tilbúnir og undirbúnir fyrir leikinn, sem verður mjög erfiður."

,,Við vitum um styrkleika þeirra og veikleika.  Við þekkjum Roberto Mancini, hann er drengur góður og góður knattspyrnumaður, líkt og forveri hans.  Við vitum að þeir verða vel skipulagðir og að þeir vilja halda fjórða sætinu, sem við erum að reyna að ná af þeim.  Við förum þangað til að reyna að sækja þrjú stig og komast fyrir ofan þá."

Lee býst við jöfnum leik en telur samt að City muni þurfa að sækja meira þar sem þeir eru á heimavelli.

,,Ég held að leikurinn verði mjög jafn en liðin gætu þurft að opna sig og sækja meira.  Við vitum hvað þeir ætla að gera.  Þeir hafa verið aðeins meira varnarsinnaðir í undanförnum leikjum og hafa hreinsað aðeins til í vörninni hjá sér.  En þeir eru á heimavelli þannig að maður býst við því að þeir sækji á okkur og vonandi þýðir það að þeir skilji eftir sig pláss."

,,Við viljum bara sigur.  Á þessu stigi tímabilsins er mikilvægt að halda áfram góðu gengi og góðu sjálfstrausti, og maður fær það bara með því að vinna leiki."

Lee notaði einnig tækifærið og hrósaði Dani Pacheco fyrir þátt hans í 1-0 sigrinum á Unirea Urziceni á fimmtudagskvöldið.  Spánverjinn ungi kom inná á 75. mínútu og átti stoðsendinguna þegar David Ngog skoraði.

,,Við vitum að hann hefur hæfileikana," sagði Lee. ,,Hann er mjög góður leikmaður og hefur góðan skilning á leiknum.  Þetta var erfiður leikur gegn vel skipulögðu liðiog það var lítið pláss til að athafna sig í sóknarleiknum, en hreyfanleiki Dani skapaði svæði fyrir okkur sem við nýttum."