Mark spáir í spilin

Nær Liverpool að losa sig við mánudagsbölvunina? Í síðustu mánudagsleikjum hefur Liverpool ekki tekist að vinna sigur. Að minnsta kosti tókst það ekki á síðustu leiktíð. Hjátrú og hindurvitni hafa lengi tengst íþróttum en getur einhver á 21. öldunni trúað á slíkt? Hvernig má það til dæmis vera að Liverpool hafi ekki tekist að sigra á mánudegi í mörg ár?

Þetta er sami inngangur og fylgdi síðasta mánudagsleik fyrir einni viku. Þá tókst ekki að vinna Wigan og nú er aftur keppt við eitt botnliðanna og það á mánudagskvöldi. Liverpool tapaði fyrri leiknum við Portsmouth sem var síðasti leikur fyrir jól. Það þótti botninn á slöku gengi þá og í kjölfarið náði liðið góðri rispu og var á tímabili komið í baráttu um að ná þriðja sætinu. Nú er annað uppi á teningnum og Liverpool verður að treysta á að önnur lið geri mistök á lokasprettinum ef fjórða sætið á að nást. En Liverpool verður fyrst og síðast að vinna sína leiki! Til þess þurfa leikmenn liðsins að koma inn á völlinn og standa í lappirnar í hverjum einasta leik sem eftir er á þessu keppnistímabili!!!  


- Liverpool hefur tapað tveimur síðustu leikjum sínum og ekki skorað mark. 

- Liverpool tapaði fyrri leik liðanna í Portsmouth.

- Liverpool hefur aðeins skorað átta mörk í þeim níu deildarleikjum sem liðið hefur spilað á árinu.

- Dirk Kuyt hefur skorað helminginn af mörkunum.

- Þeir Jose Reina, Lucas Leiva og Dirk Kuyt hafa spilað alla deildarleiki Liverpool á þessari leiktíð.
 
- Fernando Torres hefur skorað flest mörk Liverpool á keppnistímabilinu eða þrettán talsins.

Spá Mark Lawrenson

Liverpool v Portsmouth

Eftir úrslitin gegn Wigan þá verður Liverpool að vinna þennan leik til að eiga möguleika á að ná fjórða sætinu. Svo einfalt er það nú. Þetta verður ekki neinn glæsileikur en ég spái því að Liverpool vinni. Stuðlingsmenn Rauðliða vita að liðið þeirra getur stundum tapað leikjum. En öðru máli gegnir þegar liðið er að spila af svona varkárni. Ef ég væri Rafa Benítez þá myndi ég setja stríðshjálminn á mig og heimta að leikmennirnir mínir berjist fyrir sigrum.

Það er ekki lengur nein pressa á Portsmouth því liðið er svo gott sem fallið eftir að félagið fór í greiðslustöðvun. Þeir unnu 2:1 í Burnley og lögðu svo Birmingham að velli 2:0 í bikarkeppninni. En liðið kom niður á jörðinni í miðri viku eftir 2:1 tap á heimavelli fyrir liðinu hans Alex McLeish. Fyrir utan nokkra góða leikmenn þá eru bara meðalmenn í liði Liverpool en það ætti nú að geta unnið Portsmouth. 
 

Úrskurður: Liverpool v Portsmouth 2:0.