Mark spáir í spilin

Það er komið að síðasta heimleik Liverpool á þessari hroðalegu leiktíð. Mörgum spurningum er enn ósvarað um málefni félagsins. Nær liðið að rífa sig upp eftir vonbrigðin á fimmtudagskvöldið? Nær liðið fjórða sætinu? Nær liðið yfirleitt Evrópusæti? Verður Chelsea Englandsmeistari? Verður Manchester United Englandsmeistari? Verða þeir George Gillett og Tom Hicks á Anfield á morgun?

Þá er það Rafael Benítez. Verður þetta síðasti leikurinn sem hann stjórnar Liverpool? Verður hann framkvæmdastjóri Liverpool á næsta keppnistímabili? Verður hann framkvæmdastjóri Juventus á næsta keppnistímabili? Hvað leikmenn Liverpool, ef einhverjir, spila sinn síðasta leik á Anfield á gegn Chelsea?  


- Þetta er síðasti leikur Liverpool á Anfield Road á þessari leiktíð. 

- Jose Reina hefur haldið 16 sinnum hreinu og hefur enginn markmaður gjört betur í efstu deild á þessari leiktíð.
 
- Jose Reina hefur einn manna spilað alla deildarleiki Liverpool á þessu keppnistímabili.

- Liverpool tapaði fyrri leik liðanna á Stamford Bridge.

- Liverpool hefur ekki tapað í síðustu fimm deildarleikjum sínum.

- Liverpool hefur ekki tapað í síðustu tíu deildarleikjum sínum á heimavelli.

- Chelsea hefur skorað 93 deildarmörk. Liðið hefur bara einu sinni skorað fleiri deildarmörk á einu keppnistímabili. Liðið skoraði 98 mörk 1960/61.

- Markahæsti leikmaður Liverpool Fernando Torres með 22 mörk.
 

Það er erfitt að segja til um hvernig þessi leikur fer því það er spurning um hvernig leikmenn Liverpool eru á sig komnir eftir að hafa spilað í framlengingu í Evrópudeildarundanúrslitaleiknum við Atletico Madrid á fimmtudaginn. Evrópukeppnin er úr sögunni og nú ekki að neinu að keppa nema að reyna að ná fjórða sætinu í Úrvalsdeildinni. Liðið hefur aðeins tapað tvívegis á heimavelli á leiktíðinni en nú er Fernando Torres ekki til taks í sókninni. Ég hef á tilfinningunni að Chelsea muni einhvrn vegin ná að herja fram sigur í þessu leik. 

Úrskurður:  Liverpool v Chelsea 1:2.