Yossi Benayoun seldur til Chelsea

Í dag var tilkynnt að Yossi Benayoun hefði verið seldur til tvöfaldra meistara Chelsea. Það hefur legið í loftinu í sumar að Yossi færi frá Liverpool þannig að þessi frétt kemur ekki á óvart.

Yossi, sem hefur verið fyrirliði ísraelska landsliðsins síðustu árin, mun því ekki leika undir stjórn Roy Hodgson. Haft var eftir talsmanni Liverpool að gengið hefði verið frá sölu Yossi áður en Rafael Benítez hætti störfum. 

Ekki er greint frá því, á heimasíðu Liverpool, hvað Chelsea borgaði fyrir Yossi en eitthvað kemur í kassann fyrir Ísraelsmanninn. Einhverjir fjölmiðlar telja í fréttum í dag að Chelsea hafi borgað um sex milljónir sterlingspunda fyrir kappann.

Yossi Benayoun kom til Liverpool frá West Ham United sumarið 2007. Hann lék 134 leiki með Liverpool og skoraði 29 mörk.

Yossi vann sér það til frægðar að skora þrjár þrennur fyrir Liverpool og hafa fáir gert betur í þeim málum á seinni árum. Hann átti aðeins eftir að skora þrennu í Deildarbikarnum af þeim fjórum keppnum sem Liverpool tekur jafnan þátt í.

Ekki verður annað sagt en að Yossi hafi reynst Liverpool mjög vel. Hann er skapandi, leikinn og reynir alltaf að sækja. Þessir kostir hans gerðu það að verkum að hann var vinsæll hjá stuðningsmönnum Liverpool. Yossi var líka alltaf til fyrirmyndar utan vallar sem innan. 

Liverpool klúbburinn á Íslandi þakkar Yossi Benayoun fyrir sitt framlag til Liverpool og óskar honum góðs gengis.