Yossi harðorður í garð Benítez

Yossi Benayoun segir í viðtali við News of the world að Rafa Benítez hafi gert honum lífið hjá Liverpool óbærilegt.

Ísraelsmaðurinn geðþekki heldur því fram að Benítez hafi reynt að að brjóta sig niður sem leikmann þann tíma sem hann var á Anfield. Hann hafi því ekki átt annarra kosta völ en að leita sér að öðru félagi, en Yossi skrifaði sem kunnugt er undir 4 ára samning við Chelsea á dögunum.

,,Allir spyrja mig hversvegna ég hafi farið frá félaginu. Það er aðeins ein ástæða fyrir því og það er Rafael Benítez", segir Benayoun.

Benayoun segir að Benítez hafi aldrei komið fram við sig af virðingu og hann hafi átt afar erfitt með að leika undir hans stjórn.

,,Benítez virti það aldrei við mig ef ég lék vel. Það var alveg sama hversu vel ég lék. Þótt ég skoraði eða spilaði virkilega vel átti ég samt ekki von á því að vera í byrjunarliðinu í næsta leik. Í tveimur leikjum snemma á síðustu leiktíð, gegn Fulham og Lyon, púuðu áhorfendur þegar ég var tekinn út af, en ég hafði leikið vel. Benítez sagðist vera hissa á þeim viðbrögðum því ég hefði alls ekki verið nógu góður."

,,Það var eins og hann reyndi að brjóta niður sjálfstraust mitt. Þú getur ekki komið þannig fram við leikmann og ætlast til þess að hann sé hamingjusamur."

Benayoun segist hafa verið mjög óhress með framkomu stjórans í sinn garð, en vegna virðingar við félagið hafi hann ekki tjáð sig um málin meðan hann var ennþá leikmaður þess. Starfsfólkið og hinir leikmennirnir hafi þó vitað hvernig honum leið.

,,Ég vil ekki tala fyrir hönd annarra leikmanna en ég veit um aðra leikmenn sem Benítez kom illa fram við. Sjáið t.d. bara Riera og Alonso."

Benayoun segir að á æfingu fyrir síðasta leik síðustu leiktíðar hafi Benítez sagt honum að hann yrði ekki í liðinu og gæti farið að leita sér að nýjum vinnustað.

,,Hann dró mig afsíðis og þakkaði mér fyrir þriggja ára þjónustu við félagið og sagði mér að biðja umboðsmanninn minn að finna fyrir mig nýtt félag. Þannig kom Chelsea inn í myndina og það var búið að ganga frá félagaskiptunum áður en Benítez fór."