Gerrard hugsanlega með á laugardaginn

Roy Hodgson er vongóður um að Steven Gerrard verði orðinn leikfær fyrir leikinn gegn Fulham á laugardaginn.
Eins og menn mjuna meiddist Gerrard illa í leik Englendinga og Frakka þann 17. nóvember s.l. Gerrard hefur misst af síðustu fimm leikjum Liverpool vegna meiðslanna og mun örugglega ekki verða notaður gegn Utrecht á morgun, enda verða flestir ef ekki allir lykilmenn liðsins hvíldir þá. Roy Hodgson bindur hinsvegar vonir við að geta notið krafta fyrirliðans á laugardaginn, þegar fyrrum lærisveinar Hodgsons í Fulham mæta á Anfield.

,,Steven hefur lagt hart að sér undir stjórn sjúkraþjálfara og lækna félagsins og hann er á góðu róli. Það gæti jafnvel farið svo að hann næði að æfa með liðinu í dag. Ef hann nær að æfa af fullum krafti með okkur í vikunni þá á ég allt eins von á því að hann verði með á laugardaginn."  

,,Við æfum í dag og ég vona að hann geti verið eitthvað með okkur. Á morgun er leikur þannig að það verður æfingafrí þá. Síðan er æfing á fimmtudaginn og ef hann getur tekið fullan þátt í henni þá verður hann í hópnum. Við vonum það besta, en það verður alltaf að fara varlega þegar menn koma til baka eftir meiðsli. Það er ekkert betra að fara of snemma af stað."