Bill og Bob hefðu snúið sér við í gröfinni!

Liverpool goðsögnin Phil Neal segir að ef Bill Shankly og Bob Paisley hefðu séð leik liðsins gegn Wolves í gær hefðu þeir snúið sér við í gröfinni.

Í viðtali við Talksport í dag segist Neal hissa á því að Hodgson skyldi gagnrýna stuðningsmenn Liverpool eftir frammistöðu liðsins í gær, en áhorfendur á Anfield ákölluðu Kenny Dalglish í sífellu og létu óánægju sína með störf Roy Hodgson í ljós með ýmsum hætti.

,,Hodgson getur ekki kvartað yfir því þótt stuðningsmenn liðsins séu óánægðir með liðið eins og það spilaði gegn Wolves í gær", segir Neal.

,,Við áttum ekki eitt einasta skot að marki, við pressuðum ekki neitt og það var ekkert samspil í gangi. Þetta var ömurleg frammistaða. Þetta var ekki nokkur einasta skemmtun fyrir stuðningsmennina og það er ekki þeim að kenna. Það er eitthvað sem Hodgson og leikmennirnir verða að svara fyrir."

,,Ég trúði ekki að ég væri að horfa á Liverpool. Við vorum að spila gegn botnliði deildarinnar og við áttum ekki möguleika því viljinn var enginn og samspilið ekkert. Við litum ekki út eins og lið í gær, svo mikið er víst. Shankly og Paisley hefðu snúið sér við í gröfinni ef þeir hefðu orði vitni að þessu. Þetta var aumkunarverð frammistaða og menn ættu að skammast sín", segir gamli fyrirliðinn að lokum.