Fabio Aurelio með gegn City?

Mikil meiðslavandræði hrjá Liverpool þessa dagana, einkum í varnarlínunni. Einu góðu fréttirnar af varnarmönnum eru þær að líklega verður Fabio Aurelio leikfær í næsta leik, gegn Manchester City.

Aurelio hefur verið frá í mánuð vegna meiðslanna sem hann hlaut í leiknum gegn Manchester United, en nú er allt útlit fyrir að hann geti verið með í leiknum gegn hinu Manchester liðinu, Manchester City, en City menn heimsækja Liverpool næst komandi mánudag.

Ekki veitir af kröftum Aurelios því meiðslavandræðin í öftustu línu Liverpool eru ansi mikil. Glen Johnson og Daniel Agger þurftu báðir að fara af velli í síðasta leik og ekki hefur enn fengist staðfest hversu lengi þeir verða frá en óttast er að þeir verði jafnvel ekkert meira með á tímabilinu.

Þá hefur Martin Kelly ekki enn náð sér af sínum meiðslum, en hann meiddist í leik gegn West ham í lok febrúar og hefur verið heldur lengur frá en áætlað var í fyrstu.

Til að bæta gráu ofan á svart hefur ekki heldur fengist staðfest hvenær fyrirliðinn Steven Gerrard kemst aftur á ferðina.