Meiri barátta um sæti í liðinu

Jamie Carragher er ánægður með hvernig Liverpool fer af stað. Hann segir aukna samkeppni um stöður af hinu góða.

,,Við förum vel af stað. Stjórinn hefur sett okkur það markmið að vinna deildina. Það er gott markmið í upphafi leiktíðar og við stöndum undir því enn sem komið er."

,,Ef hlutirnir breytast þá setjum við okkur ný markmið. Ég held allavega að allir hjá félaginu séu fyrst og fremst að vona að liðið nái einu af fjórum efstu sætunum. Það ættu allir að verða sáttir við það, ef það næst."

,,Við höfum fengið marga nýja leikmenn. Ef við lítum yfir nýju mennina þá er Downing kannski fyrirfram stærsta stjarnan. Hann hefur líka stðið sig vel það sem af er og á örugglega eftir að gera góða hluti með okkur."

,,Síðan erum við með Suarez og það er enginn í deildinni sem ég vildi frekar hafa í mínu liði. Hann er fyrir okkur það sem Rooney er fyrir Man. U. og Tevez fyrir City. Hingað til hefur það verið Stevie sem hefur bjargað okkur út úr vandræðum, en nú er hann búinn að vera svo lengi frá að liðið treystir á að Luis bjargi málunum. Enda hefur hann margoft gert það."

,,Hópurinn er sterkari nú en hann hefur verið í langan tíma. Það er mikil samkeppni um stöður og það er jákvætt. Fólk talar um að það viti aldrei hvaða liði Kenny muni tefla fram. Það hlýtur að vera gott. Þá veit andstæðingurinn það ekki heldur."

,,Kenny er frábær stjóri og ég held að það sjái allir hvað leikmönnunum líður vel undir hans stjórn. Hann er mjög góður í að efla liðsandann og sjálfstraust leikmanna, enda koma allir skælbrosandi á allar æfingar."

,,Stuðningsmenn Liverpool muna eftir risastóra brosinu sem breiddist yfir andlit Kenny þegar hann skoraði í gamla daga. Það er nákvæmlega sama brosið og þið sjáið þegar liðið skorar í dag. Það er frábært að sjá það. Hann hefur fært leikmönnum og stuðningsmönnum gleðina að nýju."