Jamie verður áfram í liðinu

Jamie Carragher hefur sætt talsverðri gagnrýni fyrir frammistöðu sína í undanförnum leikjum. Kenny Dalglish segist þó enn hafa fullt traust á varafyrirliðanum.

Carragher varð illa á í messunni á lokamínútum leiksins gegn Bolton á dögunum. Mistök hans urðu til þess að Bolton náði að minnka muninn í 3-1, þannig að ekki hlaust stórkostlegur skaði af mistökunum. Í leiknum gegn Stoke um síðustu helgi kostaði vítaspyrnan sem dæmd var á Carra fyrir að rífa í Jonathan Walters hins vegar öll stigin í leiknum.

Vítaspyrnudómurinn var vissulega umdeildur en varð vatn á myllu þeirra sem hvað harðast hafa gengið fram í gagnrýni sinni á Carragher. Telja hann of seinan og hreinlega ekki nægilega öflugan til að vera í byrjunarliði Liverpool.

Kenny Dalglish virðist þó enn hafa fulla trú á sínum manni.

,,Jamie Carragher er í góðu lagi. Ég veit ekki hvað ég sagt meira um hann því ég vil ekki breyta honum á nokkurn hátt", segir Dalglish.

,,Jamie Carragher, ásamt Steven Gerrard, er í raun tákngervingur Liverpool. Allt sem klúbburinn stendur fyrir endurspeglast í þessum tveimur strákum. Í meira en áratug hafa þeir verið lykilmenn í liðinu og ég get ekki séð að það sé að breytast. Vissulega er meiri samkeppni um stöður í liðinu en oft áður og það mun enginn verða valinn í liðið vegna þess hvaða sögu hann á hjá félaginu."

,,Jamie og Steven eru topp atvinnumenn sem leggja sig alltaf 100% fram. Þeir fá enga sérmeðferð hjá félaginu eða mér og þeir myndu heldur ekki vilja það. Þeir vita það að enginn er áskrifandi að sæti í liðinu, hvað sem hann heitir eða hvað sem hann er búinn að vera hér lengi. Þeir eru einfaldlega frábærir knattspyrnumenn og afar mikilvægir félaginu á allan hátt."