Fleiri verða að skora!

Það má halda því fram með rökum að markaleysi og vannýting á marktækifærum hafi hamlað því að Liverpool sé nær toppliði Manchester City en raun ber vitni. Aðeins Manchester City hefur átt fleiri marktilraunir en Liverpool það sem af er leiktíðar en Rauðliðar hafa aðeins skorað 14 deildarmörk á móti 39 mörkum þeirra Heiðbláu.
 
Luis Suarez er markahæstur leikmanna Liverpool með sjö mörk og Andy Carroll hefur skorað þrjú en aðrir eru þeim að baki. Kenny Dalglish, framkvæmdastjóri Liverpool, veit vel af því að fleiri mörk vantar og vill að fleiri skori skori.

,,Það hefur enginn sagt að Luis sé sá eini sem getur skorað er það? Okkur er sama hver skorar og leikmönnunum er líka sama um það svo framarlega að við skorum. Luis skorar fyrir liðið Liverpool en ekki Luis Suarez. En það er mikilvægt fyrir okkur að eins margir og mögulega geta skori og allir vilja skora. Þessir menn geta líka vel skorað."

,,Við höfum trúlega skapað jafn mörg eða fleiri færi en hin liðin en við hefðum getað nýtt þau svolítið betur. En svo hefur nú gerst eins og í gamla daga að markmaður mótherja hefur mætt á Anfield og mat manna eftir leik hefur verið að hann hafi fengið sérstakan innblástur við að spila þar. Við erum búnir að sjá dæmi um að markmenn hafi spilað frábærlega hérna á þessu ári og það hefur líka gert okkur erfitt fyrir."

Vissulega hafa markmenn Manchester United, Norwich City og Swansea City sýnt stórleiki á Anfield og Liverpool hefur aðeins skorað sex mörk í síðustu fimm leikjum. Það þarf að ná betri nýtingu á öll þau færi sem leikmenn Liverpool eru að skapa og vonandi færist það til betri vegar það sem eftir lifir árins og svo til vors.