Steven í hópnum annan í jólum?

Steven Gerrard fer alveg að komast á ferðina aftur. Kenny Dalglish er þó varfærinn, en útilokar ekki að fyrirliðinn verði með á annan í jólum.

Liverpool mætir Blackburn á annan dag jóla og leikmennirnir verða eflaust staðráðnir í því að gera betur en gegn Wigan á sunnudaginn.

Það styttist í endurkomu fyrirliðans og hver veit nema hann geti verið með í jólafjörinu. Kenny Dalglish útilokar allavega ekkert í þeim efnum.

,,Gerrard er byrjaður að æfa og hann lítur vel út. Ég þori samt ekki að lofa því að hann verði með gegn Blackburn. Við munum þó ekki taka neina óþarfa áhættu."

,,Það meiddist enginn gegn Wigan og Jay (Spearing) er búinn að sitja af sér bannið þannig að það eru fleiri en færri í hópnum núna."

Steven Gerrard hefur verið frá keppni vegna sýkingar í ökkla frá því í lok október og stuðningsmenn Liverpool eru orðnir langeygir eftir fyrirliðanum. Það væri ekki amaleg jólagjöf til stuðningsmanna að sjá hann í búningi á Anfield á mánudagskvöldið.