Óttist eigi!

Liverpool heldur til Manchester í kvöld til móts við topplið deildarinnar. Steven Gerrard telur enga ástæðu til að óttast hið sterka lið Manchester City sem enn hefur ekki tapað á heimavelli það sem af er leiktíðar.

,,Þeir eru með frábært lið og hafa byrjað leiktíðina virkilega vel en við höfum ekkert að óttast. Við sýndum fyrir nokkrum vikum að við getum hæglega veitt þeim keppni. Svona leikir eru spennandi. Við erum ekki hræddir við svona leiki og leikmenn vilja taka þátt í þeim. Ég get ekki beðið."

,,Við höfum verið sterkir í útileikjum okkar en heima höfum við ekki náð þeim úrslitum sem knattspyrnan sem við höfum spilað hefur verðskuldað. Við höldum til leiks við City fullir sjálfstrausts með það að markmiði að gera okkar besta og sjá hvað það gefur af sér."

Nú er að sjá hvort Steven Gerrard fær sæti í byrjunarliðinu en hann hefur komið inn á sem varamaður í jólaleikjunum tveimur sem eru að baki.