Kóngurinn hinn reiðasti!

Kenny Dalglish var hinn reiðasti og var mjög harðorður í garð leikmanna sinna eftir 3:1 tapið á móti Bolton í gærkvöldi. Hann sagði leikinn þann slakasta frá því hann tók við liðinu. Kenny sagði hugarfar manna sinna kolrangt og lagði áherslu á að menn sínir þurfi að hugsa sinn gang ætli þeir að vera lengur í herbúðum Liverpool!
 
,,Úrslitin valda vonbrigðum en mestu vonbrigðin finnst mér samt þau að ég held að við höfum ekki verið tilbúnir að spila leikinn. Hugarfarið var ekki rétt og við fórum ekki rétt að í vinnu okkar. Hér hjá þessu knattspyrnufélagi hefur alltaf verið borin virðing fyrir mótherjum og því grundvallaratriði að næsti leikur er alltaf sá mikilvægasti en ekki sá sem kemur á eftir eða þar næsti eða sá þriðji næsti." 

,,Ef þeir þurftu kennslustund í þessu í dag þá fengu þeir hana. Ef þeir halda að þeir geti bara mætt og náð góðum úrslitum án þess að berjast og leggja sig fram gegn mótherjum sínum þá ættu þeir að hafa lært það í dag að svoleiðis gengur ekki.  Hjá þessu félagi hafa aldrei verið neinir sem ekki bera virðingu fyrir öðrum. Ef þetta var vandamálið og þeir töldu að þetta væri ekki jafn mikilvægur leikur og sá næsti þá er það gott og blessað en þeir verða ekki hérna áfram með svoleiðis hugarfari."