Allir verða að skila sínu!

Markið sem Steven Gerrard skoraði á Etihad leikvanginum á dögunum skilur Liverpool og Manchester City að fyrir seinni leik liðanna í undanúrslitum Deildarbikarsins. Steven leggur áherslu á að leikmenn Liverpool séu ekki of öruggir með sig þrátt fyrir að hafa forystu úr útileiknum. Þeir séu því ekki farnir að hugsa um Wembley sem bíður þeirra sem hafa betur í kvöld og allir verði að skila sínu eigi Liverpool að komast þangað.

,,Það yrði algjör draumur að lyfta bikarnum á Wembley. Auðvitað skýtur sú hugsun upp kollinum og mann dreymir um það. Svona hugsun hjálpar sem hvatning en ég held að enginn af leikmönnum okkar sé farinn að gæla við eða halda að við séum búnir að klára verkið. Við vitum að þetta er bæði mikilvægur og erfiður leikur."

Liverpool hefur ekki komist í úrslitaleik frá því árið 2007 þegar liðið fór í úrslitaleikinn í Meistaradeildinni og tapaði 2:1 fyrir AC Milan í Aþenu. Liðið lék í undanúrslitum Meistaradeildar, Deildarbikars og F.A. bikarsins næstu þrjár leiktíðir á undan og þótt Steven og Jamie Carragher séu einu mennirnir úr þeim leikjum sem enn eru hjá félaginu kemur reynsla af stórleikjum alltaf til góða.

,,Ég held að reynsla sé alltaf mikilvæg. Sérstaklega er hún mikilvæg þegar maður er með forystu í svona mikilvægri tveggja leikja undanúrslitarimmu. Við þurfum að skila okkar allra besta. Hver einasti maður verður að mæta vel stemmdur til leiks og spila vel til að við getum komist áfram. Við getum ekki verið að hugsa um stöðuna eins og hún er fyrir leikinn heldur reyna að tryggja okkur sigur í leiknum. Ég tel að það geti verið mjög hættulegt fyrir okkur að spila af of mikilli varkárni og verja forystu okkar."

Það er allt undir í kvöld og vonandi mæta leikmenn Liverpool allir ákveðnir í sín verk og ná að skila Liverpool á Wembley leikvanginn!