Köttur á Anfield Road!

Vinalegur köttur gerði sig heimakominn á Anfield Road í gærkvöldi þegar leikmenn Liverpool og Tottenham áttust við. Hann er nú orðinn heimsfrægur!
 
Kisi skaut allt í einu upp kollinum þegar ellefu mínútur voru liðnar af leiknum. Dómarinn stöðvaði leikinn og beið átekta á meðan kisi hugsaði ráð sitt. Hann skaust svo úr vítateig Tottenham og út fyrir hliðarlínu. Þar fór hann í fang vallarvarðar. Áhorfendur á Anfield og um allan heim í sjónvarpi fylgdust með kettinum vinalega og höfðu gaman af. 

Nokkrum mínútum seinna voru myndir af kisa komnir á veraldarvefinn og nú hafa verið stofnaðar síður honum til heiðurs á Twitter og víðar. Á einni síðunni hafa 25.000 gerst vinir kisa!

Ekki er vitað hvaðan kötturinn í gærkvöldi kom en á vefsíðu Liverpoolfc.tv geta menn sér þess til að kisi sé afkomandi kattar að nafni Moglet en hann var nokkurs konar lukkudýr á Anfield upp úr 1980. Sá var flækingköttur sem vallarstarfsmenn á Anfield tóku að sér og þótti hann færa liðinu gæfu enda rökuðust titlar inn á þeim árum. Eins og sjá má í frétt Liverpoolfc.tv eru kettirnir bröndóttu mjög líkir! Nú er að sjá hvort Liverpool nær ekki að vinna titil eða titla áður en þetta keppnistímabil er úti fyrst kominn er köttur á Anfield!    

Hér má sjá innkomu kisa á Liverpoolfc.tv.

Hér má sjá fjölda myndbanda á Youtube.

Hér má sjá fjölda mynda af kisa í myndaleit Google.

Hér er frétt um kisa á vefsíðu BBC.