Andy vill bæta við verðlaunasafnið!

Andy Carroll vann sín fyrstu verðlaun með Liverpool þegar Deildarbikarinn vannst í febrúar. Sigurmark hans á móti Everton í undanúrslitunum kom Liverpool á Wembley í þriðja sinn á leiktíðinni og nú vill hann bæta við verðlaunasafnið sitt.

,,Ég er búinn að leggja hart að mér og það yrði frábært að vinna annan bikar. Það er töluvert afrek fyrir mig, fjölskylduna mína og alla að hafa nú þegar náð að vinna ein verðlaun en það yrði rosalega magnað að ná öðrum. Það yrði mikið afrek fyrir félagið og þar með yrði þetta harla gott keppnistímabil."

Andy Carroll er búinn að leika tvívegis á Wembley á nokkrum vikum en á morgun er komið að þriðju heimsókn Liverpool á þjóðarleikvanginn. Liverpool hefur brugðist í deildarkeppninni en annar bikar myndi hressa alla Rauðliða við. Það er mikið undir og spennan eykst dag frá degi.

,,Þetta verður algjör stórleikur fyrir mig og félagið í heild sinni. Allir hlakka til því þetta er jú stórleikur. Ég minnist þess að hafa horft á bikarútslitaleikina þegar ég var yngri. Þetta hefur alltaf verið geysilega merkilegur leikur í knattspyrnunni."

Liverpool á erfitt verkefni fyrir höndum í úrslitaleiknum. Mótherjinn er Chelsea sem hefur magnast upp síðustu vikurnar eftir að Ítalinn Roberto Di Matteo tók við sem framkvæmdastjóri. Liðið er komið í úrslitaleik Meistaradeildarinnar og þekkir vel til á Wembley þar sem liðið hefur unnið F.A. bikarinn þrívegis á síðustu fimm árum. Liverpool hefur samt lagt Chelsea tvívegis að velli það sem af er leiktíðar. Andy segir að mótherjinn skipti ekki máli því úrslitaleikur er alltaf erfiður.

,,Það skipti engu fyrir okkur hvort við fengum Chelsea eða Tottenham. Leikurinn hefði samt sem áður orðið erfiður. Þeir hafa náð að snúa gengi sínu hressilega við og þeir eru búnir að standa sig vel. En það höfum við líka gert og þetta verður góður leikur."