Frumraun Brendan Rodgers hjá Liverpool!

Einhver talaði einu sinni um lítið skref fyrir manninn. Leikur Liverpool gegn Gomel í forkeppni Evrópudeildarinnar flokkast ekki með markverðustu leikjum í sögu félagsins. En Brendan Rodgers telur sig samt taka stórt skref í Hvíta Rússlandi í kvöld. Hann stjórnar þá Liverpool sem framkvæmdastjóri í fyrsta skipti í opinberum leik og það er stór viðburður í lífi Norður Írans. 

,,Kannski er þetta ekki einn af merkilegri leikjum í sögu félagsins en hann hefur geigvænlega mikla þýðingu fyrir mig sjálfan. Það skiptir öllu fyrir mig að stjórna liði í Evrópukeppni sem hefur farið sigurfarir um Evrópu í áraraðir."

,,Ég og leikmenn mínir munum ekki vera með neitt kæruleysi. Þetta verður auðvitað erfitt því í raun erum við ennþá á undirbúningstímabilinu og ég þarf að fara varlega í að velja leikmenn. Ég má ekki við því að missa lykilmenn í meiðsli því hópurinn er ekki svo stór."

Þetta er ekki bara fyrsti leikurinn á valdatíð Brendan Rodgers því hann sjálfur stýrir liði í Evrópukeppni í fyrsta skipti á ferli sínum. 

,,Þetta er frábært því ég stjórna liði sem framkvæmdastjóri í Evrópuleik í fyrsta sinn. Ég hef auðvitað þjálfað yngri lið úti um allan heim og í sannleika sagt er ekki mikil munur á leikaðferðum. Munurinn er sá að í leik aðalliða er meiri pressa á öllu. En þetta verður frábært fyrir mig því allir framkvæmdastjórar verða að byrja einhvers staðar. Hingað til á framkvæmdastjóraferli mínum hef ég notið hverrar mínútu. Nú er næsta áskorun mín að taka þátt í Evrópukeppni og það er frábært að leiða lið eins Liverpool til leiks."

Brendan Rodgers stjórnar Liverpool í fyrsta sinn í kvöld og verður þar með átjándi maðurinn til að stjórna liðinu frá því það var stofnað 1892.

Við óskum Bendan Rodgers góðs gengis í sínum fyrsta leik sem framkvæmdastjóri Liverpool svo og öllum þeim sem á eftir fylgja.