Tilfinningarík endurkoma!

Brendan Rodgers hélt til Wales um helgina til að stjórna Liverpool á sínum gamla heimavelli í Swansea. Hann sagði fyrstu endurkomu sína þangað hafa verið tilfinningaríka.

,,Þetta var tilfinningarík endurkoma því ég hitti svo marga sem ég deili með frábærum minningum úr lífi mínu frá því ég var hér í tvö ár. Það er frábært að koma hingað aftur. Ég mun alltaf minnast þess tíma sem ég var hér með ánægju."

Stuðningsmenn Swansea létu Brendan aðeins heyra það með vel völdum skotum en það var allt í góðu að honum fannst.

,,Mér fannst þeir sýna mér mikla virðingu og mig langar að þakka þeim fyrir það. Maður fær alltaf smá skot á sig en það var frábært að hitta fólkið fyrir leikinn."

Meðfylgjandi mynd af Brendan var tekin á leiknum sem endaði án marka eins og öllum ætti að vera kunnugt um.