Michael Owen hættir í vor!

Michael Owen, fyrrum leikmaður Liverpool, sendi í dag frá sér tilkynningu þess efnis að hann muni hætta að leika knattspyrnu í vor. Þessi tilkynning kemur svo sem ekkert mjög á óvart enda hefur Michael, sem nú leikur með Stoke City, átt við þrálát meiðsli að stríða síðustu árin.

Í tilkyningunni, sem Michael Owen sendi frá sér, segir meðal annars þetta. ,,Það er með miklu stolti sem ég tilkynni að ég ætla mér að hætta að leika knattspyrnu. Ég hef verið mjög lánsamur því ferill minn hefur falið í sér ótrúlega vegferð sem ég hefði fyrirfram aðeins getað látið mig dreyma um."   

Hvað svo sem stuðningsmönnum Liverpool finnst um Michael eftir að hann yfirgaf félagið 2004 og fór til Real Madrid þá er ekki annað hægt en að virða það sem hann afrekaði fyrir uppeldisfélagið sitt. Hann kom svo frá Spáni ári síðar og gekk til liðs við Newcastle United. Þaðan fór hann vorið 2009 eftir að Newcastle féll. Hann lét sig þá hafa það að semja við Manchester United þar sem hann spilaði til liðins vors en á þessari leiktíð hefur hann leikið með Stoke. Margir stuðningsmenn Liverpool munu aldrei fyrirgefa Michael að fullu að hafa látið það eftir sér að leika með Manchester United. En honum virtist sama því auðvitað vissi hann hvaða augum stuðningsmenn Liverpool myndu líta þann gjörning!
 

Michael Owen lék sinn fyrsta leik með Liverpool vorið 1997 og skoraði í 2:1 tapi á móti Wimbledon. Hann var þá aðeins 17 ára og hefur yngri leikmaður ekki skorað fyrir félagið. Alls lék hann 297 leiki með Liverpool og skoraði 158 mörk. Hann vann F.A. bikarinn 2001 svo og Deildarbikarinn, Evrópubikar félagsliða, Skjöldinn og Stórbikar Evrópu. Árið 2003 varð hann Deildarbikarmeistari með Liverpool í annað sinn. Michael tryggði Liverpool F.A. bikarinn árið 2001 þegar hann skoraði bæði mörk Liverpool í 2:1 sigri á Arsenal.  

Árið 2001 var hann kjörinn Knattspyrnumaður ársins í Evrópu og hefur enginn annar leikmaður Liverpool unnið það kjör. Michael var lengi helsti markaskorari enska landsliðsins og skoraði 40 mörk í 89 leikjum. Næsta víst er að aðeins meiðsli komu í veg fyrir að hann myndi slá landsliðsmarkametið sem er 49 mörk.
 
Það er nokkuð merkileg tilviljun að æskufélagarnir Jamie Carragher og Michael Owen, sem urðu saman Unglingabikarmeistarar með Liverpool 1996, skuli hætta knattspyrnu um leið. Það er þó ekki neinn vafi á því hvor þeirra skipar stærri sess hjá stuðningsmönnum Liverpool þegar upp verður staðið! 

Hér má sjá myndir af ferli Michael Owen af vefsíðu BBC.