Michael Owen hættur!

Það var ekki bara Jamie Carragher sem hætti að spila knattspyrnu núna í vor. Vinur hans Michael Owen ákvað líka að nóg væri komið og lék sinn síðasta kappleik sama dag og Jamie. Hann kom inn á sem varamaður í leik Southampton og Stoke City, sem lauk með 1:1 jafntefli, og setti þar með punkt fyrir aftan atvinnuferil sem hófst hjá Liverpool vorið 1997.

Stuðningsmenn beggja liða kyrjuðu nafn Michael meðan á leiknum stóð og það var klappað vel og rækilega fyrir honum þegar hann kom inn á sem varamaður og eins eftir leikinn. Michael segir að hann hafi verið með kökk í hálsinum þegar flautað var til leiksloka í síðasta leiknum. Myndin hér að ofan var tekin eftir leikinn.

,,Ég hef nú lítið lagt af mörkum fyrir Stoke og þess vegna var alveg magnað að þeir skyldu kalla nafnið mitt. Mig langar að þakka stuðningsmönnum Stoke og Southampton. Það fylgdu þessu blendnar tilfinningar en ég hefði ekki getað óskað eftir betri lokum á ferli sem hefur verið frábær. En það er skrýtið að honum sé lokið."

Michael Owen lék sinn fyrsta leik með Liverpool vorið 1997 og eftir 297 leiki og 158 mörk fór hann til Real Madrid sumarið 2004. Hann kom svo til Englands ári seinna og lék með Newcastle United og Manchester United áður en hann gekk til liðs við Stoke City á síðasta ári. Hann kom lítið við sögu hjá Stoke á sinni síðustu keppnisleiktíð en náði þó að skora eitt mark fyrir félagið.

Michael Owen átti glæsilegan feril með Liverpool. Hann kom fram á sjónarsviðið 1996 þegar hann raðaði inn mörkum fyrir unglingaliðið sem vann Unglingabikarinn þá um vorið. Hann skoraði í fyrsta leik sínum með aðlliðinu og er ennþá yngsti markaskorari Liverpool í öllum kepppnum. Hann vann F.A. bikarinn, Deildarbikarinn, Evrópukeppni félagsliða, Stórbikar Evrópu og Skjöldinn 2001. Hann varð svo Deildarbikarmeistari aftur 2003.

Hann tryggði F.A. bikarinn 2001 eins og allir muna með báðum mörkum Liverpool í 2:1 sigri á Arsenal. Liverpool virtist í vonlausri stöðu þegar stutt var eftir en Michael vann leikinn svo að segja upp á sitt einsdæmi. Hann fékk viðurnefnið Prinsinn af Wales í kjölfarið á þeim leik því leikið var í Cardiff. Hann skoraði í leiknum um Stórbikar Evrópu þegar Liverpool vann Bayern Munchen 3:2 og líka sigurmarkið í Skjaldarleiknum þegar Liverpool vann Manchester United 2:1. Michael skoraði svo seinna markið þegar Liverpool vann Manchester United 2:0 í úrslitaleiknum um Deildarbikarinn 2003. Þó svo Michael hafi ekki farið viturlega að á lokakafla ferils síns, að mati stuðningsmanna Liverpool, er ekki annað hægt en að virða þennan mikla markaskorara fyrir það sem afrekaði hjá félaginu okkar.  

Michael var kosinn Knattspyrnumaður Evrópu 2001 og er eini leikmaður Liverpool til að hljóta þá viðurkenningu á meðan hann lék fyrir hönd félagsins. Michael Owen lék 89 leiki með enska landsliðinu og skoraði 40 mörk. Hann er fjórði markahæsti leikmaður enska liðsins frá upphafi.   

Hér má sjá stuðningsmenn Stoke og Southampton kveðja Michael á lokadegi síðustu leiktíðar.

Hér er viðtal við Michael af vefsíðu BBC eftir síðasta leikinn.