Spáð í spilin

Liverpool mætir Norwich í 14. umferð ensku Úrvalsdeildarinnar í kvöld kl. 19:45.  Nú er um að gera fyrir okkar menn að rífa sig upp og ná góðum úrslitum eftir vonbrigði helgarinnar.


Líklega er það uppstilling varnarinnar hjá Brendan Rodgers sem flestir horfa til fyrir þennan leik en því miður hefur alltof mikið verið hringlað með miðverði það sem af er tímabils.  Kolo Toure fékk högg á mjöðm í leiknum gegn Hull og er tæpur fyrir leikinn, aðrir ættu að vera heilir og ekki myndi það koma á óvart ef Mamadou Sakho fengi loks tækifæri í þessum leik.  Hann hefur ekki verið í byrjunarliði undanfarna þrjá leiki og í síðustu tveimur hefur liðið fengið á sig 6 mörk.  Sem fyrr eru þeir Daniel Sturridge og José Enrique meiddir og verða ekki með í kvöld.


Fyrr á þessu ári, nánar tiltekið þann 19. janúar mættu Kanarífuglarnir frá Norwich í heimsókn og lauk leiknum með 5-0 sigri okkar manna.  Þeir Jordan Henderson, Luis Suarez, Daniel Sturridge og Steven Gerrard skoruðu fyrstu fjögur mörkin en fimmta markið var sjálfsmark.  Í síðustu tveimur viðreignum liðanna hafa Liverpool skorað 5 mörk og slík markaskorun má alveg halda áfram í kvöld.  Sé litið til síðustu sex leikja liðanna á Anfield hafa Liverpool unnið fjóra, einn hefur tapast og einn endað með jafntefli.  Eru þetta allir leikir milli liðanna í Úrvalsdeild en Norwich hafa, eins og flestir vita, flakkað svolítið á milli deilda.


Eins og áður sagði þurfa okkar menn nú að sýna sitt rétta andlit eftir herfilega frammistöðu gegn Hull á sunnudaginn. Ekkert annað en sigur kemur til greina í kvöld og hefur Brendan Rodgers meðal annars sagt að lið sitt tapi ekki tveimur leikjum í röð.  Við skulum vona að hann verði sannspár og nái að gíra sína menn rétt fyrir átökin.

Norwich sitja sem stendur í 14. sæti deildarinnar með 14 stig.  Aðeins er farið að hitna undir Chris Hughton stjóra þeirra en sigur á Crystal Palace á heimavelli í síðustu umferð létti aðeins á þeirri pressu.  Liðið hefur aðeins unnið einn útisigur á tímabilinu hinir 5 útileikir liðsins hafa allir tapast.

Spáin fyrir kvöldið er þessi (ekki veðurspá):  Lokatölur verða 2-0, vörnin stendur fyrir sínu og heldur loks hreinu !

Að lokum hvetjum við félagsmenn okkar til að fjölmenna á Spot, heimavöll klúbbsins í Kópavoginum.  Eins og venjulega eru tilboð fyrir félagsmenn gegn framvísun skírteina.


- Luis Suarez hefur skorað 7 mörk í fjórum leikjum gegn Norwich.

- Aðeins eitt af þessum sjö mörkum hefur hinsvegar komið á Anfield, hin sex hafa komið í tveimur þrennum á heimavelli Norwich.

- Stærsti sigur Liverpool á Norwich var 6-0 sigur á Anfield þann 21. febrúar 1979.

- Liverpool sitja í fjórða sæti deildarinnar fyrir þennan leik með 24 stig.