Kóngurinn horfði agndofa á!

Kóngurinn sjálfur sat agndofa upp í stúku og horfði að Luis Suarez skora fernu á móti Norwich. Kenny Dalglish segir að það hafi verið forréttindi að sjá Luis sýna sitt besta og skora þessi glæsilegu mörk sem voru hvert öðru fallegra. Hann hafði meðal annars þetta að segja í viðtali við Liverpool Echo.  

,,Það voru forréttindi að sjá Luis sýna sitt besta. Það var auðvitað umrót í kringum hann í sumar en mér fannst adrei vera neinn vafi á því að hann myndi leggja sig 100% fram eftir að hann kom úr banninu og fór að spila knattspyrnu á nýjan leik. Hann er bara svoleiðs leikmaður."

,,Það lifnar yfir öllu þegar hann skorar. Maður sér gleðina skína af honum og hvað það hefur mikla þýðingu fyrir hann að skora. Hann elskar að spila knattspyrnu og ber fyllstu virðingu fyrir félaginu og stuðningsmönnunum. Sá litli er að sýna sitt allra besta um þessar mundir og vonandi heldur það sem lengst áfram."

Um leið og leiknum lauk hófst mikil umræða um hvert marka Luis af þessum fjórum hefði verið flottast. Kenny hefur auðvitað sína skoðun á því eins og aðrir stuðningsmenn Liverpool. 

,,Ég verð að velja fyrsta markið. Það var líka mikilvægt sem fyrsta markið í leiknum sem braut ísinn. Hann sýndi yfirsýn, sjálfstraust og hæfileika í að taka boltann viðstöðulaust af svona löngu færi. Þetta var allt með ólíkindum hjá honum. Það hefði enginn markvörður varið þetta skot því boltinn sveif vel og féll svo niður á réttum tíma. Annað markið hans þótti kannski ekkert sérstakt því hin þrjú voru svo mögnuð en það var líka stórglæsilegt. Það þarf mikla tækni til að ná skoti við svona aðstæður." 

Margir hafa líkt Luis Suarez við Kenny sjálfan og segja hann geta orðið besta leikmann í sögu félagsins. Luis er nú búinn að skora 64 mörk í 104 leikum frá því Kenny keypti hann frá Ajax fyrir 22,8 milljónir punda í janúar 2011. Hvað skyldi Kenny segja um samanburðinn á þeim tveimur.

,,Það er þýðingarlaust að bera menn saman sem léku á mismunandi tímaskeiðum. Eina leiðin til að leggja dóm á Luis er að líta til þess sem Luis hefur gert frá því hann kom til Liverpool og hann er sannarlega búinn að skara fram úr. Það var búið að leggja drög að því að komu hans áður en ég tók við sem framkvæmdastjóri. Við vissum hversu vel hann hafði staðið sig hjá Ajax og eins vissum við hvað í honum bjó. Það var aldrei sett nein pressa á hann. Við sögðum honum bara að gera sitt besta. Það er frábært að sjá hversu vel hann hefur spilað fyrir félagið og öll mörkin sem hann hefur skorað. Hann hefur bætt sig jafnt og þétt."

Nú eru tveir mánuðir liðnir frá því Kenny Dalglish kom enn og eftur til Liverpool. Hann tók þá sæti í stjórn félagsins.

,,Í hverju felst það? Ég fæ að minnsta kosti fínasta sæti til að horfa á leikina! Ég hef alltaf sagt að ég myndi vilja hjálpa félaginu á hvern þann hátt sem ég gæti. Ég var alltaf tilbúinn að koma ef þeir töldu að ég gæti hjálpað til. Liverpool Football Club hefur gert meira en nóg fyrir mig og fjölskylduna mína í gegnum árin. Ég mun því alltaf reyna að hjálpa félaginu eins og ég mögulega get."