Niðurtalningin er hafin - 1. kapítuli

Á sunnudaginn kemur mætir Liverpool Manchester City í úrslitaleik Deildarbikarins á Wembley í London, höfuðborg Englands. Það hefur gengið á ýmsu á þessari sparktíð hjá Liverpool. En nú er tækifæri til að bæta við afrekaskrá félagsins og auka sjálfstraust og stemmningu innan vallar sem utan. Það er því mikil spenna í loftinu í Liverpool og hjá stuðningsmönnum liðsins okkar hvar sem þeir eru til sjós og lands. 

Til að magna spennuna, hefst í dag, niðurtalning fyrir úrslitaleikinn á liverpool.is. Í niðurtalningunni verður margt til fróðleiks um keppnina og árangur Liverpool í henni svo eitthvað sé nefnt. 

+ Deildarbikarinn fór af stað leiktíðina 1960-61. Þáverandi ritari enska knattspyrnusambandsins Alan Hardaker var hugmyndasmiðurinn að keppninni. 

+ Þetta er eina keppnin sem öll 92 deildarliðin í ensku atvinnumannadeildunum fjórum hafa eingöngu aðgang að. Utandeildarlið hafa ekki þátttökurétt eins og í F.A. bikarnum. 

+ Sigurvegarinn í Deildarbikarnum vinnur sér inn sæti í Evrópudeildinni. 

+ Úrslitaleikurinn á sunnudaginn verður sá fimmtugasti og fimmti í röðinni. 

+ Eftirtalin lið hafa unnið Deildarbikarinn frá upphafi keppninnar.
 
8 sinnum: Liverpool! 

5 sinnum: Aston Villa og Chelsea. 

4 sinnum: Manchester United, Nottingham Forest og Tottenham Hotspur. 

3 sinnum: Leicester City og Manchester City. 

2 sinnum: Arsenal, Birmingham City, Manchester City, Norwich City og Wolverhampton Wanderes. 

1 sinni: Blackburn Rovers, Leeds United, Luton Town, Middlesborough, Oxford United, Q.P.R, Sheffield Wednesday, Stoke City, Swansea City, Swindon Town og W.B.A. 

+ Fyrsti leikur Liverpool í keppninni var 19. október 1960. Liverpool gerði þá 1:1 jafntefli við Luton Town á Anfield Road. Tom Leishman skoraði fyrsta mark Liverpool í keppninni. Liverpool vann seinni leikinn 5:2 í Luton. Kevin Lewis 2, Roger Hunt 2 og Dave Hickson skoruðu mörkin. 

+ Liverpool keppti ekki í Deildarbikarnum aftur fyrr en leiktíðina 1967/68. Þá var farið að leika til úrslita á Wembley og varð það til þess að meiri áhugi skapaðist fyrir keppninni. Áður hafði verið leikið til úrslita með því að leika tvo leiki heima og að heiman.