Varnarveggur Plymouth hélt

Liverpool tókst ekki að brjóta varnarvegg Plymouth. Gestirnir, sem spila í fjórðu deild, unnu sér inn annan leik eftir að hafa sýnt frábæran varnarleik á Anfield. Ekkert mark var skorað og það bætist í leikjadagskrá Liverpool í þessum fyrsta mánuði ársins. 

Eins og við var búist gerbreytti Jürgen Klopp liði sínu frá því í Sunderland. Aðeins Emre Can hélt sæti sínu. Vitað var að nokkrir aðalliðsmenn voru meiddir og aðrir þurftu á hvíld að halda.

Ungliðum var raðað í liðið og kom val þeirra í raun ekki á óvart. Það var gleðilegt að sjá Joe Gomez aftur úti á leikvelli en hann hefur ekki spilað í rúmt ár vegna meiðsla. Sheyi Ojo spilaði sinn fyrsta leik á leiktíðinni. Reyndar voru nokkrir reyndir aðalliðsmenn til taks á bekknum. Uppselt var á Anfield og gestahópurinn frá Plymouth var í sannkölluðu hátíðarskapi. Leikmenn Liverpool voru sprælir í byrjun leiks en ljóst var að gestirnir myndu pakka í vörn. Snemma leiks hefði Sheyi Ojo átt að gera betur eftir að boltinn féll niður fyrir framan hann. Ungliðinn reyndi að skalla en það mistókst algjörlega. Hyggilegra hefði verið að reyna að sparka í boltann. Eftir rúman stundarfjórðung sendi Emre Can inn á Ben Woodburn sem lék sig snaggaralega í færi en Luke McCormick var snöggur út úr markinu og lokaði á piltinn. Ben var mjög áberandi á upphafskafla leiksins og lofar góðu.