Spáð í spilin

Liverpool tekur á móti Leicester á Anfield Road á morgun. Leicester er það lið í deildinni sem hefur valdið Jürgen Klopp mestum vandræðum frá því að hann tók við Liverpool. 

Liverpool og Leicester hafa mæst tvisvar á leiktíðinni, Liverpool sigraði 3-2 í deildinni en lá eftirminnilega 2-0 í deildabikarnum. Báðir leikirnir fóru fram á Filbert Street. 

Frá því að Jürgen Klopp tók við Liverpool hefur liðið þrisvar tapað fyrir Leicester. Ekkert annað lið hefur vafist jafn mikið fyrir Klopp og hans mönnum. Jamie Vardy hefur reynst okkar mönnum alveg sérstaklega skeinuhættur en hann hefur skorað sex af síðustu átta mörkum sem Leicester hefur gert gegn Liverpool. Kemur svosem ekkert sérstaklega á óvart. 

Þá er ekki síður umhugsunarvert að stjóri Leicester Claude Puel hefur ágæta sögu á Anfield, en hann hefur stýrt Lyon og Southampton til sigurs þar. Ef hann stýrir Leicester til sigurs á morgun kemst hann upp að hlið Martin O´Neill sem hefur landað sigri á Anfield með þremur ólíkum liðum, Leicester, Celtic og Aston Villa. Við skulum vona að það fari ekki að gerast. 

En að nútímanum. Leicester hefur smám saman verið að rétta úr kútnum eftir að Puel tók við liðinu og er sem stendur í 8. sæti deildarinnar. Sem fyrr er fullt af ágætis fótboltamönnum í Leicester liðinu og fara þar Mahrez og Vardy fremstir í flokki, ásamt Schmeichel og Maguire. 

Það hefur verið gott skrið á Liverpool og liðið getur endað árið með 15. leiknum í röð án taps. Það er ekki síður freistandi að enda haustið á því að fá ekki á sig mark á Anfield, en mörkin hingað til eru einungis þrjú, sem er alveg þrælgott. 

Það ætti að vera góður andi í herbúðum Liverpool núna, liðinu gengur nokkuð vel, situr í fjórða sætinu dýrmæta og dýrasti varnarmaður sögunnar er um það bil að renna í hlaðið. Það er ekkert á yfirborðinu sem segir manni annað en það að allt ætti að vera á bullandi uppleið, en undir niðri eru kannski einhver ósköp í gangi. Enn er óvíst hvað verður um Coutinho og Can og þrálátar sögusagnir eru uppi um að það komi risatilboð í Salah strax um áramótin.