Joel Matip meiddur

Sigur Liverpool á Napoli var dýmætur en hann kostaði sitt. Á allra síðustu sekúndu leiksins meiddist Joel Matip og verður frá næstu vikur. 

Meiðslin hefðu varla getað verið óheppilegri því svo til um leið og dómarinn flautaði til leiksloka stökk hann upp í skallaeinvígi. Leikmaður Napoli stjakaði við honum þannig að hann lenti illa. Svo illa að viðbein brákaðist og þarf hann að fara í aðgerð. Hann verður frá keppni í sex vikur eða svo.

Þessi meiðsli koma á versta tíma fyrir alla. Joe Gomez meiddist á dögunum og verður álíka lengi frá. Joel lék tvo síðustu leiki í hans stað og spilaði mjög vel. Hann er búinn að vera af og til frá vegna meiðsla en hefði komist inn í liðið. Að minnsta kosti hefði hann spilað eitthvað næstu vilkurnar. Dejan Lovren var frá um daginn vegna heilahristings en kom inn á gegn Napoli. Hann helst vonandi heill því hann og Virgil van Dijk  eru nú einu miðverðir Liverpool með einhverja reynslu sem eru leikfærir.