Spáð í spilin

Það er komið að fjórðu umferð Meistaradeildar, líkt og í síðustu umferð er mótherjinn Atletico Madrid en nú er leikið á Anfield. Leikurinn hefst klukkan 20:00 miðvikudaginn 3. nóvember.

Við byrjum eins og áður á því að fara yfir meiðslalistann víðfræga. Jürgen Klopp sat fyrir svörum á blaðamannafundi í dag og tjáði öllum sem vildu heyra að Naby Keita verður eitthvað frá næstu vikurnar og James Milner er ekki tilbúinn heldur. Gleðifréttir bárust hinsvegar af Fabinho og Thiago sem báðir hafa byrjað æfingar af fullu og ættu að vera tiltækir gegn spænska liðinu. Svo þarf varla að taka fram (en gerum það nú samt) að Harvey Elliott er auðvitað enn meiddur. Hjá gestunum eru þeir Antoine Griezmann og Stefan Savic í leikbanni og þeir Thomas Lemar og Marcos Llorente frá vegna meiðsla.

Ef við grípum í kristalskúluna til að spá fyrir um byrjunarlið okkar manna þá verður það líklega eitthvað á þessa leið: Alisson verður í markinu, Trent-Alexander-Arnold og Andy Robertson bakverðir. Eitthvað segir mér að Virgil van Dijk fái hvíld annað kvöld og að þeir Joe Gomez og Joel Matip verði miðverðir en það gæti alveg eins verið fals spádómur, við sjáum til. Á miðjunni verða Fabinho, Thiago og Henderson, frammi svo þeir Mané, Salah og Firmino.

Þetta er aðeins annar heimaleikur Liverpool í riðlinum og manni finnst ansi langt síðan að AC Milan mættu á Anfield í fyrstu umferð, nánar tiltekið þann 15. september. Stemmningin verður auðvitað alveg þrælgóð eins og Anfield er von og vísa á Evrópukveldi. Sigur tryggir Liverpool sæti í 16-liða úrslitum þrátt fyrir að tveir leikir séu þá eftir í riðlinum. En það þarf auðvitað að hafa í huga að spænska liðið er ekki mætt til Englands fyrir neitt annað en sigur og leikir gegn Diego Simeone eru alltaf hunderfiðir eins og við þekkjum ágætlega. Atletico Madrid hafa mætt þrisvar sinnum áður á Anfield, fyrst náðu þeir 1-1 jafntefli árið 2008 í riðlakeppni Meistaradeildar. Í annað sinn sem þeir léku í musterinu töpuðu þeir 2-1 en fóru engu að síður heim með bros á vör því þeir voru komnir í úrslitaleik Evrópudeildarinnar. Það er svo óþarfi að tala um síðasta leik þessara liða á Anfield sem var þann 11. mars árið 2020. En við stuðningsmenn horfum til síðasta leik liðanna með blik í augum þegar frábær 2-3 sigur vannst.

Spáin að þessu sinni er sú að okkar menn vinna 2-1 sigur. Bæði lið sýna sínar bestu hliðar og leikurinn verður æsispennandi allt til loka. Vonandi getum við fagnað fjórða sigrinum í riðlinum í röð annað kvöld !

Fróðleikur:

- Mohamed Salah er markahæstur Liverpool manna í Meistaradeildinni með fimm mörk.

- Fram til þessa er Sebastien Haller (Ajax) markahæstur með sex mörk og Robert Lewandowski hefur skorað fimm líkt og Salah.

- Antoine Griezmann hefur skorað þrjú mörk fyrir A. Madrid, hann verður eins og áður sagði fjarri góðu gamni í þessum leik.

- Mohamed Salah gæti spilað sinn 50. Evrópuleik fyrir félagið. Hann hefur spilað 48 leiki í Meistaradeild og 1 leik í Ofurbikar Evrópu.