Spáð í spilin

Næsti leikur er nágrannaslagur við Everton á Goodison Park. Leikurinn fer fram miðvikudagskvöldið 1. desember kl. 20:15.

Það er alltaf mikil spenna fyrir þessa leiki og að þessu sinni fáum við stuðningsmenn kannski örlítið óbragð í munn eftir viðureignir liðanna á síðasta tímabili. Atburðir leiksins á þessum velli í október í fyrra eru mörgum í fersku minni. Virgil van Dijk meiddist illa eftir stórhættulega tæklingu Jordan Pickford og löglegt sigurmark í uppbótartíma var tekið af Jordan Henderson þegar þessa víðfrægu rangstöðulínu myndbandsdómara höfðu verið teiknaðar á völlinn. Svo má líka minnast á aðra stórhættulega tæklingu á Thiago sem Richarlison fékk reyndar beint rautt spjald fyrir en það þýddi einnig að Thiago var frá í einhverja mánuði. Til að toppa ömurleika síðasta tímabils gegn nágrönnunum þá tókst þeim að vinna sinn fyrsta sigur á Anfield síðan árið 2000. Leikmenn Liverpool hljóta að horfa á þennan leik og hugsa að nú sé heldur betur tími til að sýna hvað í liðinu býr. Í sumar tók svo nýr stjóri við Everton, Rafa Benítez að nafni. Ekki þarf að fara yfir sögu hans hjá Liverpool í þessari upphitun en ráðningin vakti auðvitað mikil viðbrögð hjá bláum og rauðum í borginni svo ekki sé meira sagt.

Gengi liðanna á leiktíðinni hefur verið sitthvor sagan. Everton byrjuðu reyndar vel (fjórir sigrar í fyrstu sex leikjunum) en mikil meiðsli hafa sett strik í reikninginn og þeir hafa ekki unnið deildarleik síðan í september. Meiðsli hafa vissulega verið í herbúðum okkar manna einnig þannig að bláliðar geta ekki endalaust afsakað sig með því en hópurinn þeirra er jú klárlega ekki eins sterkur. Meiðslalisti Liverpool manna er í styttra lagi að þessu sinni sem er gott mál. Joe Gomez, Naby Keita, Roberto Firmino, Curtis Jones og Harvey Elliott eru ekki tilbúnir í þennan leik en þeir tveir fyrstnefndu mega byrja að æfa að fullu í næstu viku. Hjá Everton eru þeir Calvert-Levin, Mina og Davies frá og Holgate er í banni. Þeir endurheimta Richarlison úr leikbanni og Andre Gomes er byrjaður að æfa að fullu og gæti mögulega komið inní liðið á ný.

Ef við veltum fyrir okkur hvernig Jürgen Klopp muni stilla upp liðinu í þessum leik má fastlega gera ráð fyrir litlum breytingum frá síðasta leik. Miðjan er jú alltaf smá hausverkur en Fabinho og Henderson hljóta að byrja og líklega fær Thiago þá að vera með þeim þar. Vörn og framherjar verða líklega þeir sömu og síðast þó mögulega gæti Matip komið inn fyrir Konaté.


Liverpool hefur ekki gengið alltof vel á þessum velli undanfarin ár og í síðustu fjögur skipti hafa leikar endað jafnir (þar af þrjú 0-0 jafntefli). Síðasti sigur þeirra rauðu kom í desember árið 2016 og var hann í meira lagi sætur en Sadio Mané skoraði eina mark leiksins í uppbótartíma. Ef við förum lengra aftur í sögu útileikja á Goodison má sjá að þar á undan höfðu einmitt verið leiknir fjórir leikir sem enduðu með jafntefli og því er vonandi ákveðið mynstur að koma í ljós, Liverpool vinnur (2011), fjórir jafnteflisleikir í röð og svo aftur Liverpool sigur (2016) sem þýðir að útisigur mun líta dagsins ljós í kvöld (2021). En þetta er jú bara til gamans gert og auðvitað skiptir sagan engu máli þegar liðin labba inná völlinn í kvöld. Benítez hefur í gegnum tíðina alveg náð ágætum úrslitum gegn Liverpool þó reyndar hafi Liverpool unnið síðustu þrjá leiki gegn Newcastle þegar hann var við stjórnvölinn þar, en í fyrstu fimm leikjum sínum gegn Liverpool hafði Benítez ekki beðið ósigur (2 sigrar með Valencia, 1 jafntefli með Chelsea og svo 2 jafntefli með Newcastle).

Hvað sem söguskýringum líður þá er spáin að þessu sinni að Liverpool vinnur sigur í kvöld. Það er hreinlega ekki hægt að trúa öðru en að gæði og form liðanna komi í ljós. Reyndar geri ég ráð fyrir því að leikmenn Everton vilji spila fótbolta og ekki vera með neinn tuddaskap í kvöld en það er kannski veik von. Leikmenn Liverpool standa engu að síður í fæturnar og sýna hvað í þeim býr, lokatölur verða 0-2 og vonandi meiðist enginn alvarlega í látunum.

Fróðleikur:

- Mohamed Salah er sem fyrr markahæstur Liverpool manna með 11 mörk í deildinni.

- Þrír leikmenn Everton hafa skorað þrjú deildarmörk það sem af er, Calvert-Levin, Gray og Townsend.

- Þess má svo til gamans geta að Sadio Mané og Diogo Jota eru ansi ofarlega á lista yfir markahæstu menn deildarinnar, báðir hafa skorað sjö mörk.

- Liverpool eru í þriðja sæti deildarinnar með 28 stig eftir 13 leiki.

- Everton eru í 14. sæti með 15 stig.