Spáð í spilin

Biðin eftir næsta deildarleik Liverpool hefur verið löng en er næstum lokið. Brighton eru næsti mótherji á Anfield í 9. umferð úrvalsdeildarinnar. Leikurinn hefst klukkan 14:00 laugardaginn 1. október.

Það er rétt tæplega mánuður síðan Liverpool spiluðu í deildinni en það var 3. september gegn Everton á Goodison Park. Síðan þá náðust tveir leikir í Meistaradeild og sem betur fer náðist að sigra Ajax á heimavelli áður en landsleikjahléið skall á. Sigur er ávallt gott veganesti þegar landsleikjahlé er annars vegar.

Jürgen Klopp sat fyrir svörum á blaðamannafundi daginn fyrir leik og fór þar yfir stöðu mála. Nokkra athygli vakti að ekkert sást til Diogo Jota og Darwin Núnez á æfingu á fimmtudaginn en Klopp sagði ástæðuna einfaldlega vera þess eðlis að ferðalag þeirra til baka hafi verið langt og engin auka áhætta tekin. Þeir tveir ættu að vera tilbúnir í slaginn um helgina. Eitthvað er meiðslalistinn að styttast og ber þar helst að nefna að Ibrahima Konaté er byrjaður að æfa að fullu og alveg eins líklegt að hann verði í leikmannahópnum um helgina, en það veltur á síðustu æfingu fyrir leik. Calvin Ramsay hefur ekkert spilað það sem af er tímabils og planið með hann er að láta hann æfa stíft og spila svo með U-21 árs liðinu til að komast í leikform. Sama gildir um Caoimhin Kelleher sem Klopp sagði líta vel út á æfingum. Þeir Andy Robertson, Naby Keita, Curtis Jones og Alex Oxlade-Chamberlain eru svo áfram í sinni endurhæfingu en skv. Klopp er ekki langt í að Robertson snúi aftur út á völlinn.

Margt hefur breyst hjá mótherjunum í Brighton á undanförnum vikum en eins og allir vita er nýr stjóri þar við völd. Ítalinn Roberto De Zerbi tók við af Graham Potter og þar sem þetta er fyrsti leikur hans með liðið má ætla að Klopp og teymi hans renni nokkuð blint í sjóinn með undirbúninginn. En varla breytir nýr stjóri miklu strax í fyrsta leik enda er hann talinn vera nokkuð líkur Potter í stjórnunarstíl. Við megum því búast við sterku Brighton liði sem kann að halda bolta vel innan liðsins og gefa fá færi á sér. Þeir glíma ekki við mikil forföll í sínum leikmannahóp en það kemur reyndar lítið á óvart að Adam Lallana er tæpur fyrir leikinn en þeir Jakub Moder og Enock Mwepu verða ekki með og þar með er það upptalið. Brighton eru það lið í deildinni sem hefur fengið á sig fæst mörk allra liða, 5 talsins en þeir hafa reyndar leikið einum leik minna en mörg önnur lið.

Það er töluvert langt síðan að Liverpool vann sigur á Brighton á Anfield en þann 30. nóvember 2019 vannst 2-1 sigur. Liðin mættust svo í febrúar árið 2021 á tímabilinu sem við viljum helst varla minnast útaf meiðslavandræðum og Covid. Þar sigruðu Brighton 0-1 og það kom svosem lítið á óvart þannig séð, Liverpool gátu bara ekki keypt sér mark í upphafi árs. Á síðasta tímabili komu svo Brighton í heimsókn í lok október og þar voru lokatölur 2-2 eftir að okkar menn höfðu komist yfir 2-0 snemma leiks og allt leit vel út. Því miður tókst ekki að halda forystunni og svekkjandi jafntefli niðurstaðan. Nú er svo sannarlega kominn tími á sigur á Anfield. Alls hafa liðin leikið 13 deildarleiki á Anfield (ekki bara úrvalsdeildarleiki) og þar hafa Liverpool sigrað níu leiki, tveir hafa endað jafnir og tveir með sigri gestanna.

Spáin góða er á þá leið að Liverpool snýr á sigurbraut á ný en það verður torsóttur 2-1 sigur sem vinnst. Eigum við ekki að segja að svipuð uppskrift verði og við höfum áður séð á tímabilinu. Liverpool kemst yfir en fá á sig jöfnunarmark sem líklega verður fyrsta skot gestanna á markið. En það tekst að troða inn einu marki í viðbót og áfram heldur liðið að klífa upp töfluna.

Fróðleikur:

- Luis Díaz og Roberto Firmino eru markahæstir Liverpool manna í deildinni með þrjú mörk hvor.

- Alexis Mac Allister hefur skorað flest mörk fyrir Brighton í deildinni það sem af er, fjögur mörk.

- Liverpool eru í 8. sæti deildarinnar með níu stig eftir sex leiki.

- Brighton sitja í 4. sæti með 13 stig eftir sex leiki einnig.