Spáð í spilin

Leikið verður um fyrsta bikar keppnistímabilsins á Wembley leikvanginum í Lundúnum í dag. Liverpool og Chelsea mætast í úrslitaleik um bikar á Englandi í þriðja sinn á síðustu tveimur árum. Liverpool getur unnið Deildarbikarinn í tíunda sinn!

Liverpoool hefur átt betri leiktíð hingað til en Chelsea. Rauði herinn er í baráttu á fjórum vígstöðvum. Chelsea aftur á móti hefur ekki vegnað jafn vel. Mauricio Pochettino tók við Chelsea fyrir keppnistímabilið og hefur verið að reyna að ná tökum á stórum og vel mönnuðum leiðshópi. Á síðustu vikum virðist sem svo að liðið hefi verið að smella saman og því er það óárennilegur mótherji. Sérstaklega þar sem margir lykilmenn Liverpool eru meiddir. 

Það eru geysilega mikil meiðsli í herbúðum Liverpool. Alisson Becker, Trent Alexander-Arnold, Joel Matip, Thiago Alcantara, Diogo Jota, Curtis Jones, Stefan Bajcetic og Ben Doak eru allir meiddir. Spurningamerki er við þá Mohamed Salah, Darwin Núnez og Dominik Szoboszlai en þeir gátu ekki spilað á móti Luton á miðvikudagskvöldið. Það gæti því vantað heit liði hjá Liverpool og kannski ekki ólíklegt!


Á leiktíðinni 2021/22 léku liðin bæði um Deildarbikarinn og FA bikarinn. Í tveimur framlengdum leikjum var ekki eitt einasta mark skorað og því þurfti að útkljá báðar viðureignirnar í vítakeppni. Liverpool lánaðist að vinna í bæði skiptin. Það má því búast við jöfnum og spennandi leik í dag. 

Ef liðin spila álíka og þau hafa verið að gera hingað til á leiktíðinni á Liverpool að vinna á Wembley. En í einum leik og hvað þá í úrslitaleik getur allt gerst. Svo eru úrslitaleikir hjá Liverpool aldrei einfaldir. Venjulega eru þeir eitthvað snúnir þó svo að lokaniðurstaðan verði farsæl. 


Jürgen Klopp leiðir Liverpool til leiks. Kannski verður þetta síðasti úrslitaleikur hans með Liverpool en vonandi ekki. Það er enn möguleiki á tveimur öðrum úrslitaleikjum til vors. Þess vegna má ekki bregðast að Liverpoool fari með sigur af hólmi. Rauðir og hvítir borðar verða á Deildarbikarnum eftir leikinn á Wembley. Ég spái því að Liverpool vinni 2:1 í jöfnum leik. Cody Gakpo og Luis Díaz skora mörkin! 

YNWA!