Met í endurkomusigrum!

Páskaupprisan á móti Brighton markaði tímamót hjá Liverpool á seinni árum. Liðið setti met í endurkomusigrum í deildarleikjum á einu keppnistímabili. 

Brighton komst marki yfir eftir nokkur andartök þegar Danny Welbeck skoraði. Luiz Días jafnaði fyrir hlé og Mohamed Salah skoraði sigurmark Liverpool í síðari hálfleik. Liverpool hélt fengnum hlut og vann góðan endurkomusigur. Þetta var í sjöunda sinn á keppnistímabilinu sem Liverpool snýr tapstöðu í sigur. Það er met. Reyndar skal tekið fram að hér er aðeins átt við keppnistímabil í Úrvalsdeildinni. Hugsanlega er til eldra met því knattspyrnan hófst ekki 1992!


Sem fyrr segir var þetta sjöunda endurkoman sem hefur gefið sigur. Gamla metið var sex skipti frá leiktíðunum 2020/21, 2019/20 og 2008/09. Liðið gæti bætt þetta nýja mat því níu deildarleikir eru eftir af keppnistímabilinu. 


Af þessum fjórum leiktíðum var Jürgen Klopp framkvæmdastjóri Liverpool á þremur þeirra. Rafael Benítez var framkvæmdastjóri á leiktíðinni 2008/09.

Eins og áður kemur fram er hér aðeins um deildarleiki að ræða. Liverpool hefur líka snúið tapi í sigur í öðrum keppnum á þeim sparktíðum sem um ræðir. 

Vonandi vinnur Liverpool sína sigra með því að komast yfir það sem eftir er. Endurkomusigrarnir eru vissulega sætari en hinir fara betur með taugakerfið!