Af Suður Ameríkukeppninni

Líkt og í Evrópukeppni landsliða eru átta liða úrslit í Suður Ameríkukeppninni að baki. Skipan í undanúrslitum liggur fyrir. Þau fara fram nú síðar í vikunni. 

Argentína komst í undanúrslit eftir að hafa unnið sigur 4:2 í vítaspyrnukeppni.Sjálfum leiknum lauk 1:1. Alexis Mac Allister lagði upp mark Argentínu og skoraði svo í vítakeppninni. 

Kanada tryggði sér sæti í undanúrslitum með því að vinna Venesúela 4:3 í vítakeppni. Staðan eftir hefðbundinn tíma var 1:1. Liam Millar, fyrrum leikmaður Liverpool, misnotaði sína spyrnu í vítakeppninni en það kom ekki að sök fyrir Kanada. 

Kólumbía fór á kostum í átta liða úrslitum og burstaði Panama 5:0. Luis Díaz skoraði þriðja mark Kólumbíu. Þetta var annað mark hans á mótinu.

Úrúgvæ sló Brasilíu út. Enn þurfti vítakeppni því ekkert mark hafði verið skorað í leiknum. Darwin Núnez var í byrjunarliði Úrugvæ en lauk ekki leiknum. Alisson Becker var í marki Brasilíu. Hann varði eitt víti í vítakeppninni en það dugði ekki því Úrúgvæ vann hana 4:2.

Argentína og Kanada leika í undanúrslitum 10. júlí. Úrúgvæ og Kólumbía mætast daginn eftir.