Michael rataði ekki alveg heim

Ég er þannig náungi að mér líkar ekki fjaðrafok og ég hef ekki gaman af að sjá myndir af mér í blöðunum. Sem betur fer er fjaðrafokið nú að baki. Ég get tryggt að ég mun alltaf leggja mig allan fram, til að vinna sem flesta leiki, fyrir hvaða lið sem ég spila fyrir. Ég mun alltaf gera mitt besta.

 

Auðvitað hlaut annað hvort stuðningsmannahópur Liverpool eða Newcastle að verða fyrir vonbrigðum. Ég talaði við forráðamenn Liverpool en því miður varð ekkert af því að ég færi þangað. Svona er lífið. Stundum takst samningar og stundum ekki. Núna verð ég að horfa til framtíðar hjá Newcastle og reyna að standa mig vel í svörtu og hvítu peysunni. Svona er knattspyrnan og svona verður hún alltaf."

Michael Owen lék með Liverpool frá 1997 til 2004. Þau  158 mörk sem hann skoraði í 297 leikjum fyrir félagið segja sína sögu um hversu mikill markaskorari Michael er. Hann vann fimm titla hjá Liverpool. Hann vann F.A. bikarinn, Evrópukeppni félagsliða, Góðgerðarskjöldinn og Stórbikar Evrópu árið 2001. Árið 2003 bætti hann svo Deildarbikarnum í safnið. Michael bætti ekki í verðlaunasafnið hjá Real Madrid en 16 mörk bættust á markalistann. Þegar þetta er skrifað hefur hann skorað 32 mörk fyrir enska landsliðið í 72 leikjum. Allar þessar staðreyndir bera vott um hversu mikill afreksmaður Michael Owen er. Hann á örugglega eftir að skora mörg mörk fyrir Newcastle og ég spái því að hann hefji markaskorun fyrir félagið strax á morgun. Gott ef hann skorar ekki fleiri en eitt mark í sínum fyrsta leik. En ég er ekki viss um að hann eigi eftir að bæta mikið í verðlaunasafn sitt á meðan hann verður í herbúðum Skjóranna. Ef sú spá rætist þá gæti hún verið lykillinn að endanlegri heimkomu Michael Owen þótt síðar verði!