Í hnotskurn

- Evrópumeistararnir enduðu árið 2005 með tíunda deildarsigrinum í röð.

- Þetta var áttundi deildarsigur Liverpool í röð gegn W.B.A.

- Í þessum átta sigurleikjum hefur Liverpool skorað 28 mörk og aðeins fengið tvö á sig.

- Peter Crocuh skoraði í þriðja leik sínum í röð og hann er búinn að skora í öllum jólaleikjunum.

- Markið sem Peter skoraði var eitthundraðasta deildarmarkið sem Liverpool skorar gegn W.B.A. á Anfield Road.

- Þetta var tíundi deildarleikur Liverpool á Anfield Road á leiktíðinni. Í þeim leikjum hefur aðeins Chelsea náð að skora framhjá Jose Reina.

- Jose Reina hefur sjaldan átt rólegri dag í marki Liverpool. Hann þurfti ekki að verja eitt einasta skot í öllumleiknum.

- Chris Kirkland var að sjálfsögðu ekki í marki W.B.A. Hann er lánsmaður hjá W.B.A. og því má hann ekki leika gegn Liverpool.

- Pólverjinn Tomasz Kuszczak átti algeran stórleik í marki gestanna. Hann hefur verið varamarkvörður landsliðliðs Pólverja á eftir Jerzy Dudek.

- Áhorfendur stóðu á fætur og klöppuðu fyrir Harry Kewell þegar honum var skipt út af. Það er langt um liðið frá því Harry hefur fengið annað eins hrós frá áhorfendum á Anfield Road.

-Xabi Alonso lék sinn 60. leik með Liverpool. Hann hefur skorað sex mörk í þessum leikjum. 

Liverpool: Reina, Finnan, Hyypia, Carragher, Riise, Garcia, Gerrard, Alonso, Kewell (Sinama Pongolle 67. mín.), Cissé (Traore 89. mín.) og Crouch (Sissoko 81. mín.). Ónotaðir varamenn: Carson og Hamann

Mark Liverpool: Peter Crouch (52. mín.) 

West Bromwich Albion: Kuszczak, Watson, Curtis Davies, Clement, Robinson, Chaplow (Greening 65. mín.), Wallwork (Kamara 76. mín.), Albrechtsen, Carter, Campbell (Ellington 80. mín.) og Horsfield. Ónotaðir varamenn: Hoult og Moore.

Áhorfendur á Anfield Road: 44.192.

Maður leiksins: Harry Kewell. Ástralinn lék sinn besta leik í óratíma. Hann var gríðarlega duglegur og beinskeyttur. Aðeins frábær markvarsla markvarðar W.B.A. kom í veg fyrir að hann næði að skora sitt fyrsta mark á leiktíðinni. Harry átti líka nokkrar mjög hættulegar fyrirgjafir og ein þeirra gaf af sér sigurmarkið í leiknum. Það var eftirtektarvert að áhorfendur stóðu á fætur og klöppuðu fyrir Harry þegar honum var skipt af leikvelli. Það segir sína sögu.

Jákvætt :-) Liverpool endaði árið með tíunda deildarsigrinum í röð. Enn skorar Peter Crouch og enn heldur Jose Reina markinu hreinu. Liverpool lék af miklum krafti eins og í síðustu leikjum og það var greinilegt frá upphafsflauti að liðið ætlaði sér ekkert nema sigur. Allir leikmenn Liverpool voru duglegir og börðust vel. Liðið vann mjög sannfærandi sigur.

Neikvætt :-(  Liverpool hefði átt að skora miklu fleiri mörk. En það kom ekki að sök. Eitt dugði til sigurs.

Umsögn Liverpool.is um leikinn: Síðasti leikur þessa árs þróaðist líkt og flestir höfði spáð. Liverpool sótti án afláts frá upphafi leiksins en stókostleg markvarsla Pólverjans Tomasz Kuszczak. hélt gestunum á floti. Hann varði þrívegis frábærlega frá Harry Kewell í fyrri hálfleik og John Arne Riise átti bylmingsskot í innanverða stöngina. Tomas varði líka mjög vel þrumuskot frá Steven Gerrard. Það sama var uppi á teningnum framan af síðari hálfleik. En eitthvað varð undan að láta og á 52. mínútu kom sigurmarkið. Harry Kewell sendi þá frábæra sendingu fyrir markið. Í vítateignum stökk Peter Crouch hæst og skallaði boltann örugglega neðst í markhornið fyrir framan The Kop. Þetta var sjöunda mark Peter á leiktíðinni og hann er nú búinn að skora í öllum jólaleikjunum. Pólverjinn kom í veg fyrir annað mark frá Peter með frábærri markvörslu ekki löngu eftir markið. Hann varði þá skalla frá Peter á ótrúlegan hátt. Steven Gerrard átti svo skot rétt framhjá eftir mikla rispu undir lokin. Sigur Liverpool var aldrei í hættu og Jose Reina þurfti ekki að verja eitt einasta skot. Liverpool landaði því tíunda deildarsigrinum í röð og endaði Evrópumeistaraárið sigri. Það var vel við hæfi og stuðningsmenn Liverpool, um allar jarðir, geta haldið gleðileg áramót!