Glæsimark Antonio Barragan lagði Man United að velli

Antonio Barragan skoraði sigurmark varaliðs Liverpool gegn Manchester United í viðureign liðanna í dag. Paco Herrera gerði eina breytingu á liðinu sem sigraði West Bromwich Albion 4:0 áfimmtudaginn. Ramon Calliste var settur á bekkinn og Jack Hobbs í liðið og var jafnframt fyrirliði liðsins.

Paul Anderson var fyrstur til að ógna marki gestanna á 10. mínútu þegar skot hans fór rétt yfir mark United. Godwin Antwi var hársbreidd frá því að skora fyrir Liverpool í upphafi síðari hálfleiks en markvörður United Luke Steele blakaði skalla hans yfir markið. Ramon Calliste kom inná í síðari hálfleik fyrir Besian Idrizaj sem skoraði tvö mörk gegn W.B.A. í síðasta varaliðsleik. Ramon átti skömmu eftir innkomu sína hörkuskot að marki sem flaug framhjá samskeytunum eftir frábæran undirbúning Danny Guthrie.

Á 73. mínútu komu svo tilþrif leiksins. Antonio Barragan fékk boltann utan vítateigs og lét vaða að marki. Luke náði að koma hendinni í boltann en skotið var það fast að það dugði ekki til. Sannkallað glæsimark. Sannfærandi sigur hjá Liverpool á Manchester United sem er ávallt fagnaðarefni. Sigurinn var ekki síst sætur fyrir þær sakir að lið Manchester United var búið að vinna varaliðsdeildina áður en að þessum leik kom. Liverpool vannbáða leikina gegn United á þessari leiktíð.

Liverpool: Martin, Barragan, Smith, Antwi, Roque, Hobbs, Anderson (Hammill 79. mín.), Peltier, Idrizaj (Calliste 60. mín.), Guthrie (Flynn 85. mín.), Foy. Bekkurinn: Lancaster og O´Donnell. 

Maður leiksins: Danny Guthrie lék fyrir aftan framlínumanninn Besian Idrizaj og var duglegur að leggja upp marktækifæri fyrir félaga sína og var tvisvar nálægt því að skora eftir að hafa leikið varnarmenn United grátt en þess má geta að Danny Guthrie var eitt sinn í unglingaliði Manchester United.