Danny Guthrie skoraði gegn Blackburn

Varalið Liverpool og Blackburn gerðu 1-1 jafntefli í gærkvöldi þar sem Danny Guthrie skoraði glæsilegt mark. Gary Ablett dáðist að framgöngu þessa efnilega pilts.

Þetta var fyrsti leikur varaliðsins í deildinni síðan liðið vann Wigan 2-0 þann 1. nóvember. Frá þeim leik hefur liðið aðeins leikið æfingaleiki.

Liverpool lenti undir á 3. mínútu þegar Godwin Antwi skoraði sjálfsmark. Aukaspyrna af kantinum kom fyrir markið og Godwin stökk upp í boltann ásamt leikmanni Blackburn og fór boltinn af höfði hans yfir David Martin í markinu.

Tveimur mínútum fyrir hálfleik var komið að þætti Danny Guthrie. Hann tók við boltanum á miðjunni, átti gott þríhyrningsspil við Adam Hamill, sendi síðan boltann út á kantinn á Nabil El Zhar og brunaði inn í teiginn. El Zhar sendi boltann inn í teiginn þar sem Guthrie kom á fleygiferð og þrumaði boltanum viðstöðulaust með vinstri fæti í netið. Þetta var glæsilegt mark og átti Danny sannkallaðan stjörnuleik. Danny Guthrie var í byrjunarliði aðalliðs Liverpool í fyrsta skipti gegn Galatasaray í Meistaradeildinni og öllum er ljóst að þarna er ákveðinn drengur á ferð.

Gary Ablett þjálfari varaliðsins hrósaði Danny Guthrie í hástert: "Maður á varla eftir að sjá betra spil leiða til marks eins og Danny skoraði. Við erum ánægðir með Danny og hann hefur fengið tækifæri með aðalliðinu á tímabilinu. Hann á það skilið því hann leggur hart að sér og er fyrirliði okkar. Hann er góður leikmaður og við verðum að láta spilið fara meira í gegnum hann því hann lætur hlutina gerast."

Liverpool: Martin, Smith, Threlfall, Roque, Antwi, Guthrie, Hammill, Anderson, Idrizaj, Lindfield og El Zhar. Ónotaðir varamenn: Roberts, Darby, Flynn, Spearing og Burns.

Maður leiksins samkvæmt Liverpoolfc.tv: Danny Guthrie. Skoraði frábært mark og gerði sitt besta til að hvetja félaga sína til dáða.