Reina svekktur yfir mörkunum

Pepe Reina er hundsvekktur yfir mörkunum sem Liverpool fékk á sig gegn Chelsea í gær og leggur áherslu á að liðið verði að verjast betur föstum leikatriðum.

Reina vill þó ekki meina að svæðisvörn Liverpool liðsins sé um að kenna, menn þurfi einfaldlega að vinna vinnuna sína betur.


,,Maður er auðvitað alltaf svekktur þegar maður fær mark á sig, sérstaklega úr föstum leikatriðum. Við verðum að taka okkur á í þeim efnum. Í föstum leikatriðum má ekki missa einbeitinguna eitt augnablik, þá getur farið illa - eins og sannaðist í gær", segir Reina.

,,En alltaf þegar við fáum á okkur slík mörk þá fer í gang umræða um það hvort við eigum að halda okkur við svæðisvörnina, eða dekka maður á mann, en staðreyndin er sú að við höfum notað svæðisvörnina í fimm ár og það hefur gengið vel. Ég er ekki með tölfræðina á reiðum höndum, en ég veit að við erum eitt þeirra liða sem fær á sig fæst mörk úr föstum leikatriðum."

Næstu mótherjar Liverpool liðsins eru Blackburn Rovers, sem spiluðu ekki í vikunni og koma því úthvíldir til leiks á laugardaginn. ,,Við verðum að ýta leiknum gegn Chelsea til hliðar og mæta af fullum krafti í þann leik. Við eigum ennþá möguleika í deildinni og við verðum að halda í þá von, en það verður örugglega erfitt að eiga við Blackburn. Sérstaklega þar sem þeir hafa fengið að hvíla í vikunni."

,,Við töpuðum í gær, en það hefur ekkert að segja í leiknum á laugardaginn. Það er hreint og beint skylda okkar að vera klárir í hvern einasta leik. Nú verðum við einfaldlega að sýna það og sanna að við getum unnið deildina. Til þess að svo megi verða þurfa allir að leggja sig 100% fram í alla leikina sem eftir eru."