Fyrir tuttugu árum!

Einn afdrifaríkasti atburður í sögu Liverpool Football Club gerðist fyrir nákvæmlega tuttugu árum. Þann dag, 22. febrúar 1991, sagði Kenny Dalglish af sér sem framkvæmdastjóri Liverpool. Tilkynnt var um afsögnina á blaðamannafundi á Anfield. Kenny sagði af sér niðurbrotinn og uppgefinn eftir hið gríðarlega álag, sem fylgdi því að vera framkævmdastjóri Liverpool, hafði bugað hann. Harmleikurinn á Hillsborough hafði einnig gríðarlega mikil áhrif á Kenny og hann fór til næstum því hverrar einustu jarðarfarar þeirra sem fórust. Kenny varð að taka sér hvíld og það gerði hann af nauðsyn sjálfum sér til hjálpar og til að bjarga heilsu sinni.  

,,Allra síst vil ég skaða félagið og særa stuðningsmennina. Ef þeir eru vonsviknir þá er ég ennþá vonsviknari. Vera má að ég hafi yfirgefið Liverpool Football Club en Liverpool Football Club mun aldrei yfirgefa mig. Minningarnar og afrekin munu aldrei fara mér úr minni og ég verð alltaf stuðningsmaður Liverpool."

Nokkrum vikum eftir að Kenny sagði af sér var hann búinn að safna kröftum og tilbúinn í slaginn. En þá var búið að ráða Graeme Souness! Nú tuttugu árum seinna hefur allt snúist við. Tæplega tveimur mánuðum áður en tuttugu ár voru liðin frá því hann yfirgaf Liverpool kom símtalið sem Kenny var búinn að bíða eftir í tuttugu ár eða svo. John Henry, eigandi Liverpool, hringdi í hann og spurði hvort hann væri tilbúinn að stjórna Liverpool út þetta keppnistímabil! Kenny þurfti ekki að hugsa sig tvisvar um og þann 8. janúar 2011 var hann orðinn framkvæmdastjóri Liverpool á nýjan leik!

Kenny Dalglish var spurður út í tímamótin í dag. Hann sagðist ekki hafa haft hugmynd um sögulegt mikilvægi dagsins. ,,Í dag?! Mér líður að minnsta kosti miklu betur núna en þá. Það er mun ánægjulegra að vera hérna en þurfa að fara en það var þó óhjákvæmilegt á sínum tíma. Ég er mjög lánsamur með að vera kominn hingað aftur. Ég var mjög heppinn að hafa fengið tækifæri til að koma hingað á nýjan leik þó svo að aðstæðurnar, sem færðu mér það tækifæri, hafi verið óheppilegar. Það eru ekki margir sem fá tækifæri til snúa aftur og mér datt aldrei í hug að sýna félaginu þá vanvirðingu að taka ekki tilboðinu um að koma hingað aftur. Fyrir mig þá var það sorgardagur þegar ég yfirgaf félagið en það var sannkallaður hamingjudagur þegar ég kom aftur."

Það verður aldrei úr því skorið hversu mikil áhrif það hafði á sögu Liverpool að Kenny Dalglish þurfti að segja af sér störfum í febrúar 1991. Þá var Liverpool ríkjandi Englandsmeistari og efst í deildinni. Núna tuttugu árum seinna hefur Liverpool ekki bætt Englandsmeistaratitli í safnið og mörg erfið ár eru að baki. En King Kenny er kominn aftur og það eitt er virkilegt gleðiefni. Hver veit nema að endurkoma hans eigi eftir að hafa meiri áhrif en margir telja!