Mario sendur heim

Mario Balotelli meiddist á æfingu með ítalska landsliðinu í gær. Í fyrstu var talið að meiðslin væru smávægileg en nú í morgunsárið var tekin ákvörðun um að draga hann út úr hópnum.

Balotelli var í fyrsta sinn með landsliðinu frá því á HM í sumar og því hljóta þetta að vera mikil vonbrigði fyrir hann. Fyrstu fréttir af meiðslunum sem bárust í gær voru þær að um smáhnjask væri að ræða og framherjinn sterki ætti að geta hrist það af sér. Nú er hinsvegar komið í ljós að meiðslin eru í það minnsta það alvarleg að hann mun engan þátt geta tekið í leikjum Ítala gegn Króötum og Albönum.

Ekki hefur fengist staðfest hvers eðlis meiðslin eru en í tilkynningu frá ítalska knattspyrnusambandinu segir að læknalið Ítalanna hafi ekki viljað taka áhættuna á því að gera illt verra. Því hefur Balotelli verið sendur heim til Merseyside til aðhlynningar hjá læknaliði Liverpool.