Kemur Sergi Canos við sögu?

Alls hafa 38 leikmenn komið við sögu á leiktíðinni. Hugsanlegt er talið að ungliðinn Sergi Canos bætist við í síðustu umferðinni á sunnudaginn. 

Spænski strákurinn var í láni hjá Brentford sem leikur í næst efstu deild og vakti mikla athygli. Hann skoraði sjö mörk, sem þykir gott hjá miðjumanni, og átti þátt í nokkrum öðrum. 

Keppni í næst efstu deild er lokið og því er Sergi kominn heim til Liverpool. Hann hefur æft með aðalliðshóp Liverpool frá því hann kom til baka.

Þess má geta að Burnley vann deildina og Middlesbrough varð í öðru sæti. Þriðja liðið kemst upp í gegnum umspil.