Canos til Norwich

Í dag var salan á Spánverjanum Sergi Canos staðfest en hann gengur til liðs við Norwich City sem spila í næst efstu deild.

Canos, sem er 19 ára, kom til Liverpool frá Barcelona sumarið 2013.  Hann var á láni hjá Brentford á síðasta tímabili en náði að snúa aftur til Liverpool í tæka tíð til að spila síðasta leik liðsins á tímabilinu.  Það var gegn WBA í 1-1 jafntefli og jafnframt fyrsti og síðasti leikur Canos fyrir félagið.

Talið er að í kaupsamningi félaganna sé klásúla þess efnis að standi Canos sig vel og bæti sig mikið sem leikmaður geti Liverpool keypt hann á ný sem og fengið einhvern hlut af söluverði komi til þess að Norwich selji hann frá sér.